Nunarsuaq tamakkerlugu Aidsimut ulloritiaq (World AIDS Day)

Arfininngorneq ulloq december aallaqqaataat nunarsuaq tamakkerlugu Aidsimut ullorititaavoq. Nunarsuarmi ulloq taanna 1988-miilli malunnartinniarneqartalerpoq. HIV-mik tunillatsissimasut tapersersorniarlugit nappaammillu akiuunneq AIDS-imillu toqusimasut eqqaaniarlugit nunarsuaq tamakkerlugu Aidsimut ullorititaavoq.

-”Inuusuttut akornanni HIV-mik nappaateqalersut tunngavigalugit pingaarnerulerpoq immitsinnut paarilluarnissarput sianiginissarpullu. HIV-mik akiuunneq ataatsimoorluta qaangerniartussaavarput tamattalu iliuuseqarnissatsinnik piumasaqaateqarpoq. Qitiulluinnarpoq usuup puuanik atornissaq paasinissaanut qanoq pingaaruteqartiginersoq. Usuup puua kisiartaavoq naartunaveersaatitut kinguaassiutinullu nappaatinut illersuutaasinnaasoq,” taama oqarpoq Peqqissutsimut Naalakkersuisoq Martha Abelsen nangillunilu:

-”Kinguaassiutitigut nappaatinik pinaveersaartitsineq susassaqartunit inuiaqatigiinnillu tamanit annertuumik iliuuseqarfiginissaanut piumasaqaateqarpoq. Minnerunngitsumik nuannaarutigaara Qeqqata Kommunia HIV akiorniarlugu iliuuseqarmat inuusuttunullu suliniutit arlallit aallartisarsimammassuk. Pingaaruteqarluinnarpoq inuusuttut kinguaassiutit pillugit aaqqissutissanut ilaatinneqarnissaat.”
FN’p 2018-mi nunarsuaq tamakkerlugu Aidsimut ullorititamut qulequtaraa ”Know your status” (Killiffiit ilisimajuk). HIV-mik killifik ilisimagaanni taava ilisimaneqartarpoq tunillatsissimanerluni tunillatsissimannginnerluniluunniit. Tunillatsissimanerluni nalornigaanni imaluunniit isumaqaraanni tunillatsissimalluni misissortinnissaq pingaartuteqarpoq.

1985 -imiilli nunatsinni HIV-mik nappaatillit 185-it missaanniinnerat paasineqarpoq. Tunillatsittut amerlasuut toqoreerput ilaallu nunatta avataanut aallarsimallutik. Nunatsinni HIV-mik tunillatsissimasut ullumikkut 70-it missaanniittut inuunertik tamaat peqqinnissaqarfimmit nakkutigisaallutillu nakorsagaassapput. HIV-mut nakorsarluakkat allanik tunillaagajuttanngillat. Nakorsartissinnaaneq ukiualuit matuma siornanut sanilliullugu pitsaanerulersimagaluaqisoq anigugassaanngitsumik nappaateqarneq ilungersunartuuvoq. Tamatuma saniatigut suliassaq taanna peqqinnissaqarfimmut unammillernartuuvoq annertooq.

Usuup puui nammineq atugassat akeqanngitsumik peqqinnissaqarfimmi aaneqarsinnaapput.

Paasisaqarnerorusukkuit naalakkersuisumut allatsi Inger Heilmann Larsen oqarasuaat: +299 539371 imaluunniit e-mail: ihla@nanoq.gl aqqutigalugu attavigineqarsinnaavoq