Sanaartugassamut Kangerlussuarmi umiarsualivik nutaamut aqqusinermullu VVM akuerineqarpoq

Naalakkersuisut 26. oktober 2018-imi Kangerlussuarmi umiarsualivimmut nutaamut aqqusinermullu VVM akuersissutigaat.

Kelly Ville-miitumiarsualivimmut nutaamut manna aqqusiniusoq, 15 km-it missaannik takissuseqartoq umiarsualivimmit pioereersumit 10 km-it missaannik ungasissusilimmiippoq (takuuk matuma kinguliani nunap assinga). Umiarsualivimmi nutaami nassiussat sinersorlutillu takornariat talittarfiup sinaatigut toqqaannartumik niuneqarsinnaassapput.


Aqqusernup ingerlavissaa umiarsualiviullu inissiffissaa

Akuersissut Qeqqata Kommunianut, suliami sanaitsisuusumut tunniunneqarpoq. VVM-imut akuersissut avatangiisinut piumasaqaatinik, umiarsualiviup aqqusernullu sananeqarnerinut ingerlanneqarnerinullu atatillugu malinneqartussanik imaqarpoq. VVM-imut akuersissut VVM-imut nassuiaat, kiisalu piffissaq 5. oktober 2017-imiit 5. December 2017-imut tamanut ammasumik tusarniaaffiusoq tunngavigalugit tunniunneqarpoq.

VVM sunaana?
VVM tassaavoq avatangiisinut sunniutissanik naliliineq. VVM-imut nassuiaat suliassap avatangiisinut kingunerisassaanik tulleriiaaraluni misissuinermik imaqartussaavoq. Nassuiaat aamma suliniutissanut, avatangiisinut kingunerluutaasussanut pinaveersaartitsissutaasussanut siunnersuummik imaqartussaavoq.


VVM-imut akuersissut sunaana?
VVM-imut nassuiaat tunngavigalugu sanaartukkap avatangiisinut sunniutissat akuersaarneqarsinnaanersut, kiisalu VVM-imut akuersissummi suliassamut suut piumasaqaatigineqassanersut pillugu Naalakkersuisut isummertussaapput.

Inatsisit
VVM-imut suliassaqarfik ukunani maleruagassiuunneqarpoq:
• Atortut ilaasa avatangiisinut sunniutaannik nalilersuineq aamma avatangiisinik nakkutilliinermut akiliutit pillugit Namminersorlutik Oqartussat nalunaarutaat nr. 5, 27. marts 2013-meersoq.
• Avatangiisit innarlitsaaliorneqarnissaanik Inatsisartut inatsisaat nr. 9, 22. november 2011-meersoq (kapitali 8)

Maalaaruteqarsinnaatitaaneq
VVM-imut akuersissutip nalunaarutigineqarnerani aalajangiineq pillugu sapaatit akunnerini arfinilinni maalaaruteqarsinnaatitaaneq aallartippoq. Aalajangiineq pillugu maalaaruteqartoqassappat, maalaarut kingusinnerpaamik ulloq 7. januar.2019-imi uannga tiguneqareersimassaaq: Pinngortitamut, Avatangiisinut Ilisimatusarnermullu Naalakkersuisoqarfik, Postboks 1614, 3900 Nuuk, imaluunniit pan@nanoq.gl

VVM-imut akuersissut uani atuarneqarsinnaavoq.

Annertunerusumik paasisaqarusunnermi attaveqarfissaq: Naalakkersuisoqarfimmi pisortaaneq Mette Skarregaard Pedersen, Tlf.: 346476, E-mail: mesp@nanoq.gl