Naalakkersuisut Nunavumi inunnut 500.000 kr.-inik ikiorsiissuteqarput

Sisamanngornermi ulloq 8. november 2018 Iqalunni niuertarfissuarmi Northmartimi alianartumik kingunilimmik ikuallattoqarpoq. Pingaartumik quersuaq niuertarfissuup eqqannguaniittoq ikuallannermit eqqorneqarpoq. Taamaalillunilu illoqarfiup ukiuunerani peqqumaatissaasa ilarpassui annaaneqarput aammalu Iqalunni najugalinnut ulluinnarni nioqqutissanik allanillu pilersuinissaq ajornartorsiutaalerpoq.

 

Ikuallattoqarneranik nutaarsiassap tusarnerata kingunitsianngua Naalakkersuisut Nunavumi naalakkersuisunut saaffiginnipput, Kalaallit Nunaat pisup kingorna qanoq ikiuussinnaallunilu ikorfartuisinnaanersoq paasiniarlugu.

 

Naalakkersuisut siunnersuuteqarnerisigut Iqalunni pisumut atatillugu inunnut ikiorsiissutitut 500.000 kr.-inik ilassutitut aningaasaliissutit Inatsisartut Aningaasaqarnermut Akileraartarnermullu Ataatsimiititaliaannit akuersissutigineqarput.

 

Tassunga atatillugu Aningaasaqarnermut Nunanilu Avannarlerni suleqatigiinnermut Naalakkersuisoq ima oqarpoq: ”Nunavumi naggueqatigut taama ajornartoortillugit ikiuussinnaanerput assut nuannaarutigaara. Karrat Kangerluanni 2017-imi juunimi ajunaarnersuaqarnerani Nunavumit ikiorserneqarpugut – Nunavumut aningaasanik tapiissuteqarnitsigut maanna akiniaanerput pissusissamisoorpoq”.

 

Ikiorsiissutit Government of Nunavumut tunniunneqassapput.

 

Sukumiinerusumik paasisaqarusuttut attavigisinnaavaat naalakkersuisoqarfimmi pisortaq Nikolai Sten Christensen, e-mailikkut allaffigalugu, nsch@nanoq.gl, imaluunniit oqarasuaatiikkut 346675 sianerfigalugu.