Annaassiniarnermut upalungaarsimaneq kommunini ingerlaqqittariaqarpoq

Karrat kangerluanni pinngortitami ajunaarnersuaqareernerata kingorna, upalungaarsimanermik nalinginnaasumik, pingaartumillu ajunaarnersuaqarneranut aammalu ajunaarnersuaqarneranut assingusumik pisoqarneranut atatillugu kommunit isumaginninneranni iluaqutissartaasut ajoqutissartaasullu misissoqqissaarneqarnerannik Naalakkersuisut suliaqassasut, 2017-imi ukiaanerani ataatsimiinnermi Inatsisartut aalajangerput. Taamatuttaaq upalungaarsimanermut atortut pissarsiarineqarsinnaasut naammannersut misissueqqissaarnermi naliliiffigineqassasoq, Inatsisartut aalajangerput. Misissueqqissaarneq maannakkut naammassivoq aammalu inernera nassuiaammi, linki matuma kinguliani allassimasoq aqqutigalugu aaneqarsinnaasumi, saqqummiunneqarput.

 

Misissueqqissaarnermi ilaatigut inerniliisoqarpoq, annaassiniarnermut upalungaarsimaneq kommunini ingerlaqqittariaqartoq, kiisalu atortut inatsimmi pisussaaffiliissutaasut akunnattumik imaluunniit tamatuminnga annertunerusumik pitsaassuseqartut. Taamaattoq atortut inatsimmi pisussaaffiliissutaasut tallimararterutaat pitsaasuunngillat imaluunniit pitsaanngitsorujussuullutik. Nassuiaammi aamma erseqqissarneqarpoq kommunit upalungaarsimanermik pilersaarusiornertik pitsanngorsassagaat, ilanngullugu kommunit upalungaarsimanermut pilersaarutinik suliaqassasut. Piumasaqaat taanna Naalakkersuisut malitseqartitsivigissavaat aammalu kommuninut sisamaasunut, suli upalungaarsimanermut pilersaaruteqanngitsunut erseqqissassallugu. Naalakkersuisut taamatuttaaq, upalungaarsimanermut atortut inuttallu suut minnerpaamik illoqarfinniitinneqassanersut nunaqarfinniitinneqassanersullu pillugu kaajallaasitat nutarterneqarnissaat, aallartippaat.

 

”- Kommunit aamma Naalakkersuisut innuttaasunut inuiaqatigiinnullu iluaqutaasumik upalungaarsimanermut qaffasissumik anguniagaqarnissaat Naalakkersuisut pingaartippaat. Tamatta isumannaatsuunissatsinnut toqqissisimanissatsinnullu upalungaarsimanerup ingerlalluartuunissaa pisariaqarpoq”, oqarpoq Avatangiisinut, Pinngortitamut Ilisimatusarnermullu Naalakkersuisuugallartoq Erik Jensen.

 

”- Karrat kangerluanni pinngortitami ajunaarnersuaqarnera tamatta eqqaamavarput. Kikkut tamarmik sukkasuumik naleqquttumillu iliuuseqarnissamut piareersimanissaat pingaaruteqartoq nalunngilarput. Piareersimanissaq, aammalu pisoqarsinnaanerata piareersimaffiginissaa pingaaruteqarpoq. Taamaattumik upalungaarsimanermut pilersaarutit aamma sungiusartarnerit pisariaqarluinnarput, taamaalillutik suliassaqarfiit tamarmik suleqatigiillutik, ajornartoornermik pisoqalissappat pisoqalerpallu, piareersimassallutik sungiusarsimassallutillu”, nangippoq Naalakkersuisoq.

 

”- Karrat kangerluanni pinngortitami ajunaarnersuaqarneranut atatillugu suliaqarsimasut tamarmik immikkut qutsavigerujussuarneqartut, Naalakkersuisut misissueqqissaarnermut tassunga atatillugu erseqqissarusuppaat. Innuttaasut, suliffeqarfiit, oqartussat aamma kattuffiit nammineq kajumissutsiminnik sulisut, inuppassuit immikkut ittumik suliaqarput aammalu suleqatigiinnissamut annertuumik piumassuseqarneq takutillugu. Karrat kangerluanni pisumi nunatsinni upalungaarsimasut – sapiitsuliortortatta – ilungersunartumik pisoqarnerani iliuuseqarnissamut annertuumik pisinnaasaqarlutik piginnaaneqarlutillu takutippaat”, naggasiivoq Naalakkersuisoq Erik Jensen. 

 

”Kommunini upalungaarsimaneq pillugu nassuiaat” aajuk uani.

 

Paasissutissanik annertunerusunik piniarnermi attaveqarfissaq: Naalakkersuisoqarfimmi pisortaaneq Mette Skarregaard Pedersen oqarasuaat: 346476 e-mail: mesp@nanoq.gl