Naligiissitaanermut Siunnersuisoqatigiit ilaasortassarsiuunneqarput

Blomst

Kalaallit Nunaanni Naligiissitaanermut Siunnersuisoqatigiit piffissaq qinigaaffiat naassaaq 31. december 2018, ukiunullu 2019-imiit 2022-mut siunnersuisoqatigiinnut ilaasortassanik nutaanik toqqaasoqassaaq.

 

- Angutit arnallu atorfissaqartippagut maani inuiaqatigiinni naligiissitaalernissap siuarsarnissaanut pimoorullugu sulissuteqarusuttut nukimminnillu Naligiissitaanermut Siunnersuisoqatigiinni atuerusussinnaasut. Naligiissitaaneq ataatsimoorluni sulissutigineqartussaavoq tamatumani pineqarmata inuiaqatigiinni kikkuugaluartulluunniit tamarmik kissaatigisamittut inuuneqarnissaminnut periarfissaqarnissaasa kiffaanngissuseqarnissaasalu qulakkeerneqarnissaat," Naalakkersuisoq Martha Abelsen oqarpoq.

 

Naligiissitaanermut Siunnersuisoqatigiit suliassaraat inuiaqatigiinni allanngoriartorneq malinnaavigissallugu aamma Namminersorlutik Oqartussat, kommunit namminersortullu naligiissitaaneq pillugu apeqqutini siunnersortassallugit. Siunnersuisoqatigiit aammattaaq Nunani Avannarlerni siunnersortaallutik naligiissitaanermik suliaqartunut attaveqaataapput. Kiisalu siunnersuisoqatigiit innuttaasunut oqartussaasunullu naligiissitaaneq pillugu paasissutissiisarnermut kajumissaarisassapput suleqataasarlutillu.

 

Naligiissitaanermut Siunnersuisoqatigiit siulittaasoqarput arfinilinnillu ilaasortaqarlutik kommunit, kattuffiit partiillu inassuteqarnerisigut Naalakkersuisunit toqqarneqartartunik. Siunnersuisoqatigiinni arnat angutillu akornanni naligiimmik agguataarsimasoqarnissaa anguniagaavoq.

 

Kattuffiit, suliffeqarfiit il.il. tamarmik, taakkuninnga suliaqartut imaluunniit taakkuninnga sullissisut naligiissitaanermut siunnersuisoqatigiinnut ilaasortassanik inassuteqarnissamut pisinnaatitaapput. Toqqagassatut inassutigineqartunut piumasaqaatigineqartutuaavoq suliassaqarfiit siuliini taaneqartut ilaannik ataatsimik arlalinnilluunniit ilisimaarinnittuussasut. Kattuffiit siunnersuisoqatigiinnut inassuteqarsinnaasut ukuupput:

  • kattuffiit sulinermik inuussutissarsiutilinnut sulisitsisunulluunniit sinniisuusut

  • Kattuffiit, peqatigiiffiit, pisortat suliffeqarfiutaat il.il. meeqqanik inuusuttunilluunniit imaluunniit meeqqanut inuusuttunullu sullissisut

  • Kattuffiit, peqatigiiffiit, pisortat suliffeqarfiutaat il.il. ilinniartitaanermik, atuarfeqarnermik ilisimatusarnermilluunniit suliaqartut

  • Kattuffiit, peqatigiiffiit, suliffeqarfiit il.il. suiaassutsit inissisimaffiinik imaluunniit suiaassutsit ataasiakkaat soqutigisaannik pisinnaatitaaffiinillu suliaqartut

 

Naligiissitaanermut Siunnersuisoqatigiit ilaasortassaannik inassuteqarnissamut 10.12.2018 killiliunneqarpoq. Naligiissitaanermut Siunnersuisoqatigiit qinigaarlaat piffissaq qingaaffiat ulloq 1. januar 2019-imiit 31. december 2022-imut ingerlassaaq.

 

Naligiissitaanermut Siunnersuisoqatigiit annertunerusumik atuarneqarsinnaapput siunnersuisoqatigiit nittartagaanni uani: www.nali.gl

 

Annertunerusunik paasissutissarserusukkuit ttaveqarfigissavat Peqqissutsimut Naalakkersuisoqarfimmi ataqatigiissaarisoq Rógvi Finnsson Johansen oqarasuaat.: +299 34 66 06 imaluunniit e-mail: rofj@nanoq.gl