Qimmit 50 procentii akiuussutisssamik kapineqartussatut nalunaarsorneqalersimapput

23. november 2018-imi naqqitaq

Kommunit 14-15.000-inik qimmeqartoq nalunaarutigisimavaat. Kisitsisit paasissutissanik katersuivimmeersut kingulliit aqqutigalugit takuneqarsinnaavoq qimmit qimuttut 7.000-it missaanniittut nalunaarsorneqarsimasut, qimmit qimuttut tamarmiusut 50 procentiisa missaanniittut. Qimmit paasissutissanik katersuivimmi nalunaarsorneqarsimasut 5O procentii sinnilaarlugit eqqortumik akiuussulissalerneqarsimapput. Taamaalilluni qimmit qimuttut 25 procentiisa missaanniittut qimmit nappaataannik napparsimalersinnaanermut eqqortumik akiuussutissalerneqarsimapput.


Kommunit qimmit mikrochipsilerneqarnissaat eqqortumillu akiussutissamik kapitinneqarnissaat akisussaaffigaat, taakkulu qitiusumik nalunaarsuiffimmut nalunaarutigineqarsimanissaat aamma akissussaaffigaat – nalunaarsuiffigineqartartoq Naalakkersuisunit malinnaaffigineqartuarpoq.


- Nuannaarutigeqaara kommunit qimmit akiuussutissamik kapuinernut aamma mikrochipsinik ikkussuinernut sulissuteqartorujussuummata, taamaalilluni qimmit nalunaarsorneqarsimasut piuminarnerusumik akiuussutissamik siunissami kapineqartalersinnaassapput, Aalisarnermut, Piniarnermut Nunalerinermullu Naalakkersuisoq, Nikkulaat Jeremiassen oqarpoq.


Qimmiaraq pingasunik qaammateqaleraangat siullerpaamik parvovirusimut qimmillu nappaataannut akiuussutissamik kapineqartarpoq, qaammallu ataaseq qaangiukkaangat aamma kapineqaqqittarluni. Ataatsimik ukioqaleraangat aamma kapitinneqassaaq, taassuma kingorna ukiut pingasut qaangiunnerini aamma akiuussutissamik kapineqartassalluni. Taamaalilluni ataatsimik ukioqalernissaanut pingasoriarluni kapineqartussaavoq.


- Ilisimavara kommunit qimmip akiuussutissamik ataatsimik ukioqalernissaata tungaanut arlaleriarlugu kapineqartarnissaanut piffissaasuanermik nukissanillu amigaateqarnermik nalaanneqarsinnaasartut. Taamaattoq neriuutigilluinnarpara akiuussutissamik kapuisarneq siunissami aporfeqarpallaarani pisarumaartoq, pingaaruteqarluinnarpormi aaqqissuussaasumik akiuussutissamik kapuisarnerup iluatsittumik ingerlalernissaa, Nikkulaat Jeremiassen erseqqissaavoq.


Januaarip aallaqqaataa 2017 aallarnerfigalugu inatsisitigut piumasaqaataalerpoq qimmit, qimmit nappaataannut aamma parvovirusimut akiuussutissamik katinneqartalissasut, mikrochipimillu aamma nalunaaqutserneqartassasut. Mikrochippit nuna tamakkerlugu qitiusumik nalunaarsorneqartarput.


Nuna tamakkerlugu akiuussutissamik kapuinissap chipsinillu ikkussuinissap aallartinneqarnissaanut aamma ingerlanneqarnissaanut aningaasanut 2017-imut inatsisikkut aningaasaliisoqarpoq. 4,5 million koruunit 2017-imut aningaasaliissutigineqarput, 1,8 million koruunit 2018-imut, 1,6 million koruunit 2019-imut 2,3 million koruunillu 2020-mut.


Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl