Kalaallit Nunaata kinguaassiutitigut atornerluineq akiorniarlugu suliniutai Canadap ilinniarfigerusuppai

Isumaginninnermut Aqutsisoqarfik aamma Inersimasunik meeraanerminni kinguaassiutitigut atornerlunneqarsimallutik kingunerlutsitsisunik katsorsaasut angalaqatigiittartut Canadami nuna tamakkerlugu inuit kattuffiannit – Inuit Tapiriit Kanatami, ataatsimeersuarnissaanni "The Prevention of Child Sexual Abuse in Inuit Nunangat Forum" saqqummiiartoqqullugit qaaqquneqarput.

 

Kattuffiup Inuit Tapiriit Kanatami, Killiliisa – Naalakkersuisut kinguaassiutitigut atornerluineq akiorniarlugu periusissiaat 2018-2022-mi saqqummiunneqartut isumassassiorfigissallugit assut soqutigaat. Kattuffiup ingammik periusissiami maligassiuisut, oqartussaqarfiit assigiinngitsunik suliallit akornanni suleqatigiinneq, tamakkiisumik sammisumik suliniutit aamma suliniutinik ineriartortitsinermi atuutsitsilernermilu nunaqqatigiinnik peqataatitsinerup pingaaruteqarnera immikkut soqutigaat.

 

Inuit Tapiriit Kanatami kinguaassiutitigut atornerluineq akiorniarlugu namminneq periusissiassaminnik inunnut 60.000-nut Canadami inuusunut, kinguaassiutitigut atornerluinermik aamma isumaginninnermi unamminartunik allanik Kalaallit Nunaanni atuuttunut assingusunik atugaqartunut siunnerfeqartussamik maannakkut ineriartortitsinialeruttorput. Taamaattumik Isumaginninnermi Aqutsisoqarfik ataatsimeersuarnermi Killiliisa pillugu ineriartortitsineq, saqqummiussineq, atuutsitsilernerlu pillugit saqqummiissaaq. Tamatumunnga peqatigitillugu Inersimasunik meeraanerminni kinguaassiutitigut atornerlunneqarsimallutik kingunerlutsitsisunik katsorsaasut angalaqatigiittartunit tarnip pissusiinik ilisimasallit Kalaallit Nunaat tamakkerlugu kinguaassiutitigut atornerlunneqarsimasunik katsorsaallutik sulinerminni misilittakkatik pillugit avitseqateqassapput.

 

”Nunat allat kinguaassiutitigut atornerluineq akiorniarlugu suliaqarnitsinnik isumassarsitissinnaagatsigit assut tanngassimaarutigaarput.  Tamatuma takutippaa kinguaassiutitigut atornerluineq akiorniarlugu suliaqarnitsinni pingaaruteqarluinnartunik suliniuteqartugut, Peqqinnissamut, Isumaginninnermut Inatsisinullu Atuutsitsinermut Naalakkersuisoq Martha Abelsen oqarpoq.

Ataatsimeersuarnissaq ingerlanneqassaaq 20.-21. novembari 2018-imi, Ottawami, Canadami.

 

Paasisaqarnerorusukkuit attavigiuk ministerip allattaa Inger Heilmann Larsen, e-mail: ihla@nanoq.gl imaluunniit oqa. +299 539371