Sanaartugassamut “Nuummi Mittarfiup allineqarnissaa”-nut ASN-imut nassuiaatip nutaamik tusarniaassutigineqarnissaa

ASN-imut nassuiaat nutaamik sapaatit akunneranni sisamani tamanut ammasumik tusarniaassutigineqartussanngorlugu nassiunneqarpoq. Tusarniaanermut atatillugu Kalaallit Airports A/S, sanaartugassamut sanatitsisuusoq, Nuummi innuttaasunik ataatsimiititsissaaq.

 

ASN-imut nassuiaat siornatigut 6. februar 2018-imiit 3. april 2018-imut tamanut ammasumik tusarniaassutigineqarpoq. Nutaamik tusarniaanermut ASN-imut nassuiaammi allannguutit annertuut, ilaatigut nipip sunniutissaannut, isumalluutinik atuinermut, nunamik mingutsitsinermut, nunap qaani imermut, imermut errortuivikumut aammalu pinaveersaartitsilluni iliuutsinut tunngasut peqqutaapput.

 

Kalaallit Airports A/S 11. december 2018-imi nal. 19:00 Katuami ASN-imut nassuiaat pillugu innuttaasunik ataatsimiititsissaaq.

 

Tusarniaanermi akissuteqarnissamut tallimanngorneq 14. december 2018, nal. 16:00 killigitinneqarpoq. Tusarniaanermi akissuteqaatit uunga nassiunneqassapput: Pinngortitamut, Avatangiisinut Ilisimatusarnermullu Naalakkersuisoqarfik, Postboks 1614, 3900 Nuuk, imaluunniit mail-ikkut, uunga: PAN@nanoq.gl.

 

Tusarniaanermut najoqqutassat aammalu paasissutissat tusarniaanerpiamut tunngasut allat Naalakkersuisut tusarniaanermi nittartagaani nassaarineqarsinnaapput, uani:: http://naalakkersuisut.gl/høringer

 

ASN sunaana?

ASN tassaavoq Avatangiisinut Sunniutissanik Naliliineq. ASN-imut nassuiaat suliassap avatangiisinut kingunerisassaanik tulleriiaaraluni saqqummiussinermik imaqassaaq. Nassuiaat aamma suliniutissanut, avatangiisinut kingunerluutissanut pinaveersaartitsissutaasussanut siunnersuutinik imaqassaaq.

 

ASN-imut akuersissut sunaana?

Naalakkersuisut ASN-imut nassuiaat tunngavigalugu sanaartugassap avatangiisinut sunniutissai akuersaarneqarsinnaanersut, kiisalu suliassap ASN-imut akuersissummik tunineqarnissaanut piumasaqaatit suussanersut isummerfigissavaat.

 

Sukumiinerusumik paasisaqarusuttut Pinngortitamut, Avatangiisinut Ilisimatusarnermullu Naalakkersuisoqarfik attavigisinnaavaat oqarasuaatikkut 34 50 00 imaluunniit e-mailikkut: PAN@nanoq.gl.