AG-ip allaatigisaanut pingaarnermut naqqiut

Kuannersuarni suliniut pillugu ASN nalunaarusiamut allaqqitassiamut takunnissinnaatitaaneq pillugu AG-ip allaatigisaanut pingaarnermut naqqiut

Aatsitassanik Suliassaqarfinnut Avatangiisinut Aqutsisoqarfiup pingaartippaa, ullumikkut AG-ip Kuannersuarni suliniut pillugu, ASN nalunaarusiaq allaqqitassiaq pillugu, allaatigisamini pingaarnermi eqqunngitsumik oqaaseqaataa naqqissallugu.

 

Aatsitassanik Suliassaqarfinnut Avatangiisinut Aqutsisoqarfiup Kuannersuarni suliniut pillugu, ASN nalunaarusiaq allaqqitassiaq naammassineqanngitsoq, pisortat ingerlatsinerannut inatsit atuuttoq naapertorlugu tunniussimavaa. Tusagassiuutinut aamma soqutigisaqaqatigiinnut tunniussinermi, pinerit tamaasa sukumiisumik erseqqissarneqartarsimavoq, allaqqitassiaq naammassineqanngitsoq pineqarmat.

 

Taamaammat pingaaruteqarpoq erseqqissassallugu, ASN nalunaarusiamik naammassisimasumik peqanngimmat. Aatsitassanik Suliassaqarfinnut Avatangiisinut Aqutsisoqarfik maannamut allaqqitassianik naammassineqanngitsunik pingasunik tigusaqarsimavoq, taamaallaallu tuluttut allassimasunik.

 

Allaqqitassiat suliarineqarsimapput ASN-imik sulianut (suliassap nassuiarnera) pilersaarutit tunuliaqutaralugit. ASN-imik sulianut pilersaarut inatsisit naapertorlugit 2014-imi kikkunnut tamanut ammasumik tusarniutigineqarsimavoq. Suliap nassuiarnera aamma suliap nassuiarneranut sukumiisumik nalunaarsuineq aalajangeeqataavoq, ASN nalunaarusiaq sunik imaqassanersoq.

 

ASN nalunaarusiaq suliarineqareerpat, ASN-imut malittarisassani piumasaqaatinik eqqortitsissaaq, pisortat tamanut ammasumik tusarniutigineqarnissaannut siunertaqartumik akuersinissaat sioqqullugu. Piumasaqaatit ilaat ataaseq tassaavoq, Kalaallit Nunaanni innuttaasut nalunaarusiat tuluttut, kalaallisut aamma qallunaatut atuarsinnaassagaat. Nalunaarusiat eqikkarneqassapput, atuaruminartumik oqaaseqarlutik. Taassuma saniatigut imarisaanut arlalippassuarnik piumasaqaateqartoqarpoq.

 

Pingaarnertut pineqarpoq, nalunaarusiat innuttaasunut saqqummiunneqartussat, naammattumik nassuiaateqarnissaat aamma aatsitassanut ikummatissanullu inatsisip piumasaqaataannik Naalakkersuisullu malittarisassanik eqqortitsinissaa.

 

Nalunaarusiat aamma allaqqitassiat maannakkut eqqortitsinngillat.

 

Piumasaqaatit tassaapput:

        

  • ASN-i suussusiissaaq, siulittuissaaq, allaaserinnissaaq, nalilersuiffiginnissaaq aamma paasissutissiissaaq suliniutip killiffinni tamani avatangiisinut sunniutigisinnaasai pillugit (ilagalugit misissuinermi, sanaartornermi aamma ingerlatsinermi killiffiit, kiisalu piiaaffimmik matusinermi aamma matusinerup kingorna)

  • ASN-ip suliassaqarfik, suliniummit sunnerneqarsinnaasoq tamaat sammissavaa. Suliniut piiaaffiup avataani sumiiffinnik ilaqarpat, assersuutigalugu aqqusinernik, umiarsualivinnik, ruujorit aqqutaannik, mittarfinnik aamma umiarsuit aqqutaannik ilaqarpat, taava taakku sunniutaat aamma ilanngunneqassapput

  • ASN-i innarliinaveersaarluni iliuusissanik suliniutip pitsaanngitsumik sunniutigisinnaasaannut aaqqiisinnaasunik siunnersuuteqassaaq

  • ASN-i pinngortitamut, uumasunut aamma naasunut, kiisalu kikkulluunniit peqqinnerannut attuumassuteqartunik, sananeqaatinit avatangiisinut navianartunit sunnerneqarsinnaanerat pillugu pissutsinik tamanik imaqassaaq

  • ASN-i kingusinnerpaamik suliarineqassaaq, ingerlatseqatigiiffik aatsitassaqarfimmi piianissamut akuersissummik qinnuteqarnissaminut aalajangerpat

  • ASN-i aatsitassanut pisortaqarfimmit nutarterneqarnissaa piumasarineqarsinnaavoq, assersuutigalugu suliat ingerlaneri, sumiiffik aamma suliat allanngorpata

  • ASN-i avatangiisinik tunngaviusumik misissuinernik tunngaveqassaaq (tunngaviusumik misissuinerit), nalinginnaasumik ukiut 2-3 sivisuuseqartunik, sumiiffik sulianit aamma sanaartornernit sunnerneqarnissaa sioqqullugu.”

     

    (ASN-ip suliarineqarnissaanut malittarisassat (avatangiisinut sunniutinik nalilersuinerit) Kalaallit Nunaanni aatsitassanik piiaanermut, Aatsitassanik pisortaqarfik 2015, qupperneq 5).

     

    Malittarisassat tamanut saqqummiuneqarsimapput uani www.naal.gl kalaallisut aamma qallunaatut uani: https://naalakkersuisut.gl/da/Naalakkersuisut/Departementer/Natur-Miljoe/Miljoestyrelsen-for-Raastofomraadet.

ASN nalunaarusiami pissutsit tamarmik, malittarisassanik eqqortitsinersut, Aatsitassanik Suliassaqarfinnut Avatangiisinut Aqutsisoqarfiup ilisimatusarnikkut siunnersuisuinit attaveqanngitsunit, Pinngortitaleriffimmi, Avatangiisinut Nukissiuuteqarnermullu Ilisimatusarfimmi aamma Aarhus Universitetimi nakkutigineqarneri ingerlanneqartarput.

Paasisimasaqarluartut ataatsimoortut, ASN nalunaarusiap allaqqitassiap aatsitassanut inatsisip aamma malittarisassat piumasaqaataannik eqqortitsinersoq nalilersuisarput. Nalilersuinermi amigaatinik nassaartoqassappat, pisortat aatsitassanut inatsimmi paragraffi 74, imm. 2 naapertorlugu aalajangiisinnaapput, nalunaarusianik avatangiisinut sunniutaasinnaasunik nalilersuinermi (ASN) atugassanik suli allanik sanasoqassasoq, imaluunniit ASN-imik sanasussaasoq suli misissuisariaqartoq imaluunniit pissutsinik aalajangersimasunik sukumiisumik avatangiisinut sunniutaasinnaasunik nalilersuinermi pingaaruteqartunik nalilersuisariaqartoq.

Maannakkut allaqqitassiaq oqaatsinut aamma imarisaanut piumasaqaatinik eqqortitsinngilaq.

Avatangiisinik aqutsisoqarfiup naggasiutigalugu malugeqquaa, ASN-i allaqqitassiaq aatsitassanut inatsit naapertorlugu, tamanut ammasumik tusarniutigineqartussanngorlugu nassiunneqaraangat, kikkut tamarmik ASN-i allaqqitassiaq pillugu tusarniaanermi akissuteqarnissamut aamma oqaaseqaateqarnissamut peqataanissamut periarfissaqartut.

Allaqqitassiaq naammassineqanngitsoq, maannakkut taamaallaat Avatangiisinut aqutsisoqarfimmi tuluttut pigineqarpoq, pissarsiarineqarsinnaavoq Aatsitassanik Suliassaqarfinnut Avatangiisinut Aqutsisoqarfimmut uunga eamra@nanoq.gl saaffiginninnikkut.

 

Sukumiinerusumik paasisaqarusuttut Aatsitassanik Suliassaqarfinnut Avatangiisinut Aqutsisoqarfimeersoq Najaaraq Demant-Poort saaffigisinnaavaat, oqarasuaatikkut 34 68 38 sianerfigalugu imaluunniit e-mailikkut: nasd@nanoq.gl