Meeqqat pillugit Siunnersuisoqatigiinni nutaani, piffissami 2019-imit 2021-mut atuuttussani ilaasortassanik inassuteqarnissaq

Oqartussaasut, paaqqinniffiit aamma kattuffiit peqatigiiffiilluunniit inassuteqarsinnaatitaasut, Meeqqat pillugit Siunnersuisoqatigiinni, piffissami 2019-imit 2021-mut atuuttussani ilaasortassanik maanna inassuteqarsinnaanngorput. Kattuffiit paaqqinniffiillu attuumassuteqarnertik pissutigalugu inassuteqarsinnaatitaasut allattorsimaffiat ima suliaavoq, Kalaallit Nunaat tamakkerluni Meeqqat pillugit Siunnersuisoqatigiinni sinniisuutitaqarnissamut periarfissaqarluni.

Meeqqat pillugit Siunnersuisoqatigiit ilaasortaraat suliamik ilisimasalittut toqqagaasut arfinillit kiisalu Meeqqat Illersuisuat, taanna Meeqqat pillugit Siunnersuisoqatigiinni siulittaasuuvoq. Meeqqat pillugit Siunnersuisoqatigiit aamma Meeqqat Illersuisuat Naalakkersuisunit toqqarneqartarput.

Meeqqat pillugit Siunnersuisoqatigiit ilaasortaraat sulianut tunngassuteqartunik ilisimasallit, meeqqanut suliassaqarfimmi iliuusissanik ineriartortitsinerni Meeqqat Illersuisuannut ikiuuttussaasut, meeqqanut tunngassutillit suulluunniit pillugit Meeqqat Illersuisuannut siunnersuisussaallutillu ilitsersuisussaasut, aamma suliassaqarfinni piginnaasaqarfigisaminni ilisimasatik atorlugit ikiuuttussaasut. Meeqqat pillugit Siunnersuisoqatigiit ima katitigaassapput, meeqqat peroriartortarnerat ineriartornerallu, meeqqat atuartuunerat, meeqqat kulturikkut sunngiffimmilu sammisassaqartinnerat, meeqqat peqqissuunissaat, meeqqat inatsisitigut inissisimanerat pillugit aammalu meeqqanut immikkuullarissunik pisariaqartitsisunut tunngasunik annertuumik ilisimasaqartoqassalluni.

Meeqqat pillugit Siunnersuisoqatigiit allaffissornikkut sullinneqarnerat meeqqat pisinnaatitaaffiinut sullissivimmit MIO-mit isumagineqartarpoq.

Inassuteqarsinnaatitaasut allattorsimaffiat uani takuneqarsinnaavoq. Oqartussat, paaqqinniffiit aamma kattuffiit peqatigiiffiilluunniit inassuteqarsinnaatitaasut kisimik Meeqqat pillugit Siunnersuisoqatigiinni, piffissami 2019-imit 2021—mut atuuttussani ilaasortassanik inassutiginnissinnaapput.

Paasisaqarnerorusuttoqartillugu attavigineqassaaq Isumaginninnermut Inatsisinillu Atuutsitsinermut Naalakkersuisoqarfik ugguuna iian@nanoq.gl