Aalisartut aamma piniartut pilluaritsi

All.: Nikkulaat Jeremiassen, Aalisarnermut, Piniarnermut Nunalerinermullu Naalakkersuisoq

Aalisarnermut, Piniarnermut Nunalerinermullu Naalakkersuisutut nunatsinni aalisartut piniartullu tamaasa qamannga pisumik ullorsiornissinnik pilluaqquassi. KNAPK aamma pilluaqqorusuppara taassumalu nunami maani isorartoqisumi immikkoortortaqarfippassuini siulersuisut. Siulersuisut inuussutissarsiumminnik pitsaanerulersitsiniarlutik suliuartut. 

Ukiumut qaangiuttumut qutsavigisinnaasakka arlaqarput: Sinerissap qanittuani umiatsiaararsorluni aalisartumut nunatta aningaasarsiorneranut ikinngeqisunik  aningaasaleeqataasartumut. 

Sinerissap qanittuani aalisariutilimmut, inuiaqatigiit aaqqissugaanerata sukkanerusumik ineriartornissaanut aningaasaleeqataasartumut.

Avataasiortunik kilisaataatileqatigiinnut, nunatta karsianut akileraarutitigut aningaasarpassuarnik aningaasalersuisunut. 

Piniartumut, qasueqaluni ilaquttaminut napatitsisumut.  

Inuit pineqartut oqaluuserineqanngikkaluarpata, tassaqaana inuiaqatigiittut maannakkut aaqqissuussaanerput anguneqarsimassagaluarpa. Matumani erseqqissarneqaqqippoq nunatta nappataata pingaarnersaa tassaammat aalisarneq piniarnerlu. 

Inuussutissarsiutit sernigisussaavagut, taakkuninnga inuussutissarsiuteqartut angusaqarluaqqullugit Naalakkersuisut Naalakkersuisooqatigiilernissaminnut isumaqatigiissutiminni tupinnanngitsumik  qitiutippaat. 

Aalisartut piniartullu ullorsiornerannut atatillugu Naalakkersuisoqatigiit isumaqatigiissutaasa pingaarnersaasa ilaannit issualaarusuppunga: Aalisarnikkut inuussutissarsiorneq nunatta nappatigaa, taamaattumillu ineriartortittuarnissaa naleqqussartuarnissaalu pisariaqarpoq. 

Taamaattumik aalisarneq pillugu inatsisissap, sivisuumik attanneqarsinnaasup, Naalakkersuisooqatigiit susassaqartullu nunatsinni naapeqatigiissutigineqarsinnaasumik suliaqassapput, inuiaqatigiinni annertunerpaamik iluaqutaasumik. Tamatumunnga ilassutigalugu oqaatigisinnaavara ataatsimiititamik tamatumunnga suliaqartussamik pilersitsisoqartussaammat. 

Naalakkersuisoqatigiinnissami isumaqatigiissummi ilaatigut pingaartinneqarpoq nunatsinni aalisagartassat pisassiissutigineqartartut tamakkerlugit qaqinneqartarnissaat naalakkersuisoqatigiit anguniarmassuk, taamatullu aalisakkat tamakkiisumik atorluarneqarnissaat qulakkeerneqartassalluni aamma allaffissornikkut sullissinermi pisariaqanngitsumik aporfiulersut aaqqiivigineqarnissaat Naalakkersuisooqatigiit sulissutigissagaat. 

Ilanngullugu erseqqissarusuppara Naalakkersuisut pingaartimmassuk piniakkanik atuineq piujuaannartitsinermik tunngaveqarluni ingerlanneqassammat, kinguaariit piniagassaqartuarnissaat qulakkeerniarlugu siunissamilu piniartutut inuuniuteqarnerup ingerlaqqissinnaanera tassuunakkuttaaq qularnaarniarlugu. 

Qamannga pisumik ullorsiornissinni pilluaqquassi.