Naalakkersuisut filmværkstedimut tapiisut

Qulequtaq “Aka Hansen: Piorsarsimassuseq politikerinit soqutigineqanngippallaaqaaq” (Sermitsiaq.ag ulloq 8. November 2018) nangillugu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisup nuannaarutigalugu nalunaarutigissavaa, filmværkstedemik pilersitsinissamut aningaasaliisoqartoq.

2018-imut Inatsisartut Aningaasanut Inatsisaanni suliniutinut nutaanut sillimatinut aningaasanik, tassani ilaatigut pineqarlutik eqqumiitsuliornermut kulturimullu tunngasut, immikkoortitsisoqarpoq. Oktober 2018-imi immikkoortitat taakku aningaasaliissutigineqarput eqqumiitsuliortullu qinnuteqarsinnaanngorlutik katillugillu 3,5 mio. kr. eqqumiitsuliornermut kulturimullu qaffaassutaanerat nuannaarutigineqarsinnaanngorluni, tassannga 1 mio. kr. film.gl-imut, filmiliortartut atugaannut pitsanngorsaanermut, tassani filmværkstedemik pilersitsinissamut atorneqassallutik.

Naalakkersuisoq ima oqarpoq:
“Nuannerpoq filmværkstedemik pilersitsinissamut, filminik suliaqartartut ilungersorlutik anguniarnikuusaannut, aningaasaliilluni. Sullivimmit tassanga suliat siunissami takunissaat qilanaaraakka, sulilluarnissaannillu kissaallugit.”

Taakkua saniasigut Naalakkersuisut nunatsinni filmiliornermik sulianut 20-nut 2,9 mio. kr.-nik 2018-imi aningaasaliipput kiisalu 7 mio. kr. missaat kulturikkut sulianut allanut aningaasaliillutik.

Annertunerusumik paasisaqarnerorusukkuit, Judith K. Nielsen oqarasuaatikkut (+299) 53 06 27 imaluunniit e-mail judk@nanoq.gl , aqqutigalugit attavigineqarsinnaavoq.