Naalakkersuisut suliassaanik agguataarineq

Naalakkersuisut siulittaasuat Kim Kielsen ullumikkut aalajangerpoq Ineqarnermut Attaveqaqatigiinnermullu Naalakkersuisup Simon Simonsen-ip aamma Pinngortitamut, Avatangiisinut Ilisimatusarnermullu Naalakkersuisup Siverth K. Heilmann-ip napparsimallutik sulinngikkallarneranni Naalakkersuisut suliassaqarfiisa agguataarneqarnerat nalimmassarneqassasoq.

Taamaattumik aalajangiunneqarpoq Siverth K. Heilmann-ip napparsimanerata nalaani Aatsitassanut Suliffeqarnermullu Naalakkersuisup Erik Jensen-ip Avatangiisinut Ilisimatusarnermullu Naalakkersuisoqarfimmi suliassat tigummigallalissagai.

Aamma aalajangiunneqarpoq Simon Simonsen-ip napparsimanerata nalaani Inuussutissarsiornermut Nukissiuuteqarnermullu Naalakkersuisup Aqqalu Jerimiassen-ip Ineqarnermut Attaveqaqatigiinnermullu Naalakkersuisoqarfimmi suliassat tigummigallassagai.

Nuummili, Ilulissani aamma Qaqortumi mittarfiliornissamut tunngatillugu Inatsisartunut siunnersuutip suliarineqarnerani Aningaasaqarnermut Nunanilu Avannarlerni suleqatigiinnermut Naalakkersuisup Vittus Qujaukitsup suliamik tigumminnittuunera allanngortinneqassanngilaq.

Sapaatip akunnerani matumani ”Ineqarnermut Attaveqaqatigiinnermullu” tunngatillugu Inatsisartuni oqaluuserineqartussat isumaqatigiissutaareersut naapertorlugit Naalakkersuisumit Erik Jensen-imit aamma Naalakkersuisumit Vittus Qujaukitsumit agguataarneqarumaarput.

Sukumiinerusumik paasisaqarusuttut attavigisinaavaat Naalakkersuisut Siulittaasuata Naalakkersuisoqarfiani pisortaq Søren Hald Møller 34 50 00-imut sianerlutik attavigisinnaavaat.