Namminersorlutik Oqartussat Pinngortitamut Avatangiisinullu Nersornaasiuttagaannut 2018-imi toqqagassat

Plastikkinik atuineq annikillisinniarlugu immikkut suliniuteqartumik – imaluunniit pinngortitaq aamma imaani avatangiisit plastikkinut eqqakkanut illersorniarlugit immikkut suliniuteqartumik ilisimasaqarpit? Taamaappat taanna Namminersorlutik Oqartussat Avatangiisinut Pinngortitamullu Nersornaasiuttagaannut 2018-imut inassutigisinnaavat. Nersornaasiuttagaq 30.000 koruuniuvoq.

Kikkut Avatangiisinut Pinngortitamullu Nersornaasiuttagaat 2018 pissarsiarisinnaavaat?
Nersornaat inunnut, sullissivinnut imaluunniit kattuffinnut, maligassiuisutut aammalu sullissilluartutut tamatsinni pinngortitap avatangiisillu eqqumaffiginissaannut kivitseqataasunut imaluunniit suliniuteqarnerminni Kalaallit Nunaanni avatangiisit pitsanngorsarniarlugit aalajangersimasunik suliniuteqartunut nersorinnissutitut, tunniunneqartarpoq. Ukioq manna suliffeqarfiit, kattuffiit imaluunniit inuit ataasiakkaat, plastikkinik atuineq annikillisinniarlugit aalajangersimasunik suliniuteqartut imaluunniit pinngortitamik aamma imaani avatangiisinik plastikkinut eqqakkanut illersuiniarlutik aalajangersimasunik suliniuteqartut immikkut toqqarneqassapput.

Illoqarfitsinni pinngortitamilu plastikkit eqqakkat maaniinnarmiittut isigiuminaapput, pingaartumillu imaani sinerissamilu plastikkit avatangiisini ajornartorsiutaapput, uumasunut ajoqusiisarlutik. Taamaalillutik ilisimatuut timmiakuluit Kalaallit Nunaanneersut 70-it aqajaruiniittut misissorsimavaat, aammalu timmissat taakkua 80%-iinit amerlanerusuni aqajaruini plastikkinik nassaarsimallutik.

Taamaattumik illoqarfinni, nunaqarfinni, pinngortitami imaluunniit imaani avatangiisini plastikkinik eqqakkanik piiaalluni suliniuteqartumik ilisimasaqarpit? Imaluunniit suliffeqarfimmik, kattuffimmik imaluunniit inummik plastikkinik atuinerup annikillisinnissaanik suliniuteqartumik ilisimasaqarpit? Inuit ataasiakkaat, suliffeqarfik imaluunniit kattuffik pineqarnersoq apeqqutaatinnagu, taakkua Namminersorlutik Oqartussat Avatangiisinut Pinngortitamullu Nersornaasiuttagaannut 2018-imut inassutigisinnaavatit. Nersornaat 30.000 koruuniuvoq aammalu nersornaaserneqartunut ataatsimut arlalinnulluunniit agguaanneqarsinnaallutik.

Qanoq iliorlunga nersornaammut inassuteqarsinnaavunga?
Ukioq manna Avatangiisinut Pinngortitamullu Nersornaasiuttagaannut inassuteqaatit nassiussinnaavat uunga pan@nanoq.gl imaluunniit uunga Pinngortitamut, Avatangiisinut Ilisimatusarnermullu Naalakkersuisoqarfik, Postboks 1614, 3900 Nuuk 18. november 2018 tikitsinnagu.

Inassuteqaat sunik imaqassava?
Inassuteqaat tunngavilersuummik naatsumik, inummut imaluunniit inunnut inassuteqaammik nassiussisunut attaveqarfissamut paasissutissanik kiisalu inunnut, suliffeqarfinnut imaluunniit kattuffinnut inassutigineqartunut attaveqarfissamut paasissutissanik, imaqassaaq.

Paasissutissanik annertunerusunik piniarnermi attaveqarfigineqassaaq Pinngortitamut, Avatangiisinut Ilisimatusarnermullu Naalakkersuisoqarfik pan@nanoq.gl imaluunniit oqarasuaammut 346031