Namminersorlutik Oqartussat Polar Seafood Greenland A/S-ip eqqartuussivimmut suliassanngortitsineranut pinngitsuutinneqarput

Kalaallit Nunaanni Eqqartuussivik oktobarip 11-anni 2018-imi eqqartuussummik nalu­naa­ruteqarpoq, tassani Namminersorlutik Oqartussat Aalisarnermut, Piniarnermut Nunalerinermullu Naalakkersuisoqarfik, Polar Seafood Greenland A/S-ip suliakkiu­taa­nut tunngasumi.

Polar Seafood Greenland A/S-ip naalakkersuisoqarfik eqqartuussivimmut tunniussi­ma­vaa piumasaralugulu Polar Seafood Greenland A/S raajanik itisoormiunik 767 tonsinik pisassiissutinik tuneqqeqqulluni, taamaassanngippat 7,5 million koruunit missaannik taar­seeqqullugu.

Kalaallit Nunaanni Eqqartuussivik inerniliivoq Polar Seafood Greenland A/S eqqortumik suliamullu tunngasumik sullinneqarsimasoq kiisalu raajanik itisoormiunik aalisarneqar­tut pillugit nalunaarsuinermi kukkunerit tassaasut Polar Seafood Greenland A/S-ip kisi­mi kukkunerinik tunngaveqartut. Naalakkersuisoqarfik taamaammat pinngitsuutinne­qarpoq.

Taassuma saniatigut Polar Seafood Greenland A/S-ip naalakkersuisoqarfik eqqartuussi­vimmut suliassanngortissimavaa pinerluttulerinermut suliami eqqartuussissuserisunut aningaasartuutinut allanut 600.000 koruunit missaaniittunik taarseeqqulluni. Naalakkersuisoqarfik tunngavilersuummik taassuminnga tunngaveqartumik aamma tassunga pinngitsuutinneqarpoq.

Taamaalilluni aalajangiunneqarsinnaalerpoq raajanik itisoormiunik pisassiissutinik nuunneqarsinnaasunik 767 tonsinik Polar Seafood Greenland A/S-ip tunineqarnis­saanut itigartitsinikkut Polar Seafood Greenland A/S-ip naalakkersuisoqarfimmik pissaanermik equtitsisutut assigiinngisitsillunilu pissuseqartutut isiginninnera eqqar­tuussiviup isumaqatiginngikkaa. Tamanna malittarisassanik atuuttunik tunngaveqar­poq.

Kalaallit Nunaani Eqqartuussiviup eqqartuussutaa piffissami matumani Nunatta Eqqartuussisuuneqarfianut suli suliassanngorteqqinneqanngilaq.

Suliamut tunngatillugu allanik paasissutissanik pisariaqartitsiguit Naalakkersuisoqarfiup pisortaanera Jørgen Isak Olsen attavigineqarsinnaavoq ugguuna oqarasuaat 345308 imaluunniit e-mail: APNN@nanoq.gl.