Inuussutissarsiornermut Nukissiuuteqarnermullu Naalakkersuisoq inuussutissarsiorneq pillugu nittarsaassilluni Kinamiippoq

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen sapaatip akunnera 44-imi Kina-miippoq. Angalaneq inuussutissarsiornermi nittarsaassineruvoq, Kalaallit Nunaanni inuussutissarsiornermut suliassaqarfinnut assigiinngitsunut Kina-mi niuerfiit annertunerusumik ammaanneqarnissaannut iluaqutaasussaq. Taamaalilluni suliffeqarfiit aallartitat 20-it angullugit najuutissapput.

Nittarsaassineq Kina-mi niuerfinni ammaassinissaq siunertaralugu ukiuni kingullerni suliaqarnerup ingerlateqqinneraa.

Suliffeqarfiit sinniisuusut assigiinngiiaartuupput, ilaatigut atisaliornikkut / atisanik ilusilersuinermi nutaaliat, takornariartitsisarnermi, imermik aammalu erngup nukinganit nukissiuutinik Kalaallit Nunaanneersumik avammut nioqquteqarnerup iluanni, tunisassianik assigiinngitsunik asseqanngitsunillu arlalippassuarnik saqqummiiviulluni.

Inuussutissarsiornermut Nukissiuuteqarnermullu Naalakkersuisoq oqaaseqarpoq:

Assut nuannaarutigaara suliffeqarfiit amerlasuut assigiinngitsullu inuussutissarsiornermi nittarsaassinermut tapersersuinerat. Neriuutigaarput suliffeqarfiit Kina-mi suleqatissaminnik attavissarsiortorumaartut, kalaallit nioqqutissiaannik Kina-mut niueruteqalernermik assigiinngitsutigut kinguneqarsinnaasunik.

Pisussanut pilersaarummiissapput aaqqissuussinerit akuleriaat Inuussutissarsiornermut Nukissiuuteqarnermullu Naalakkersuisumit aaqqissuunneqartut, kiisalu ingerlatseqatigiiffiit pisortanilu oqartussat immikkut toqqartukkat tikillugit ataatsimeeqatigineqartassallutik.

Angalaqatigiit arfininngorneq 3. november Nuummut uteqqissasut naatsorsuutigineqarpoq.

Annertunerusumik paasisaqarusunnermi attaveqarfigineqassaaq Naalakkersuisoqarfimmi pisortaaneq Jørn Skov Nielsen, Inuussutissarsiornermut Nukissiuuteqarnermullu Naalakkersuisoqarfik, oqarasuaat +299 55 61 88, e-mail: jsn@nanoq.gl