Naqqiut: Kangerlussuarmi aamma Narsarsuarmi mittarfiit siunissami takissusissaat pillugu aalajangiisoqanngilaq

All.: Simon Simonsen, Ineqarnermut Attaveqaqatigiinnermullu Naalakkersuisoq

"Kangerlussuarmi mittarfimmi mittarfiup siunissami takissusissaa pillugu Borgmesteri Malik Berthelsen peqatigalugu tusagassiuutitigut nalunaarutiga, aalajangiinissamut suliap ingerlanera pillugu aamma inatsimmut tunngaviusut pillugit nalornilersitsisimasinnaasoq eqqumaffigaara, taamaattumik makkua erseqqissarnissaat kissaatigaara:

 

Ukiaanerani ataatsimiinnermi matumani Nuummi aamma Ilulissani nunanit tamalaanit mittarfiit kiisalu Qaqortumi nunap immikkoortuani mittarfiup sananeqarnissaannut, ingerlanneqarnissaannut aningaasalersorneqarnissaannullu killiliussatut piumasaqaatit pillugit inatsit Inatsisartuni suliarineqarpoq.

 

Inatsisissatut siunnersuummut nassuiaatini qupperneq 21-imi allassimavoq ”Kangerlussuup aamma Narsarsuup atorneqaannarnerisa annertussusaa sunniutaasussallu suleqatigiissitaliani marlunni Namminersorlutik Oqartussanit, Qeqqata Kommunianit aamma Kommune Kujallermit ilaasortaaffigineqartuni, qulaajaavigineqassaaq. Kangerlussuarmi aamma Narsarsuarmi mittarfiit siunissami atorneqarnissaannut ingerlanneqarnissaannullu pilersaarummik inaarutaasumik innersuussinissaq, siunnersuutip matuma avataani inissisimavoq”.

 

Inatsisartut Qaqortumi, Nuummi aamma Ilulissani mittarfinnik sanaartornissaq pillugu inatsisissatut siunnersuummut saqqummiunneqartumut isummereerpata, Naalakkersuisut kommunit suleqatigalugit siunissami Narsarsuarmi aamma Kangerlussuarmi pisariaqartitsinernik qulaajaanissaat pisussanngussaaq. Kommuninik oqaloqateqarnerni assersuutigalugu aningaasaqarnikkut, inuiaqatigiinnut inatsisitigullu sunniutaasussanik nassuiaanerit aallaavigineqassapput.

 

Aalajangiinissamut tunngavissanik, neriunarluni aaqqiissutissanik illuatungeriit tamarmik tapersersinnaasaattut ilusilinnik, suliaqarnissaq pillugu Kommune Kujalliup aamma Qeqqata Kommuniata suleqatiginissaat Naalakkersuisoqarfigalu qilanaaraarput.

 

Naggasiutigalugu ataasinngorneq ulloq 15. oktobari innuttaasunik ataatsimiititsinermut takkuttoqarluarneranut aammalu ataatsimiinnerup pitsaasumik pilersitsiviulluartumillu nipeqartumik ingerlasimaneranut, Kangerlussuarmi innuttaasut qutsavigaakka. Innuttaasut toqqaannartumik oqaloqatigisinnaagakkit nuannaarutigisorujussuuara.

Tamatuma saniatigut Borgmesteri Malik Berthelsen Nunaqarfimmi aqutsisut peqatigalugit najukkami takornariartitsisartunik naleqarluartumik."


Sukumiinerusumik paasisaqarusuttut naalakkersuisup allattaa Steve Sandgreen attavigisinnaavaat e-mailikkut: stes@nanoq.gl