Inuit innarluutillit tapersersorneqarnissaannut inatsisissatut siunnersuutip tusarniutigineqarnera

Isumaginninnermut Inatsisinillu Atuutsitsinermut Naalakkersuisoqarfiup inuit innarluutillit tapersersorneqarnissaannut inatsisissatut siunnersuut tusarniaassutigalugu ulloq 8. oktobari nassiuppaa.

2018-imi maajimi nutaanik Naalakkersuisoqalernerata kingorna, siusinnerusukkut inatsisissatut siunnersuummut saqqummiunneqartumut atatillugu nassuiaaterpassuit politikkikkullu apeqqutit peqqissaartumik isumaliutersuutigineqarnissaat ilanngunneqarnissaallu Naalakkersuisunit kissaatigineqarsimavoq. Taamatuttaaq nutaamik naalakkersuisoqatigiinnissamik isumaqatigiissummi ilaqutariit ilanngunneqarnissaat annerusumik ukkanneqarpoq, tamannalu inatsisissatut siunnersuutip nutaamik qimerloornissaanut pissutissaqalersitsisimavoq. Taamaalilluni Inatsisartut ukiakkut ataatsimiinneranni 2017-imit inatsisissatut siunnersuummi saqqummiunneqartumi allannguutit suliarineqarsimapput, taamaattumillu inatsisissatut siunnersuut nutaamik tusarniaassutigineqarpoq.

Pingaaruteqarpoq erseqqissassallugu, kinguartitsineq inatsisissatut siunnersuummik suliaqarnermik pingaartitsinnginnermik pissuteqanngimmat – akerlianilli. Inuit innarluutillit tapersersorneqarnissaat pillugit nutaamik inatsimmik saqqummiussisoqarnissaanut pisariaqartitsineq annertoorujussuusoq Naalakkersuisut ilisimavaat. Taamaattoq inatsisissatut siunnersuutigineqartussap sapinngisamik suliarilluagaanissaa aamma uagutsinnut inuiaqatigiinnut naleqqussarneqarsimanissaa Naalakkersuisut qulakkeerusuppaat.

Inuit innarluutillit tapersersorneqarnissaat pillugu inatsisissatut siunnersuut nutaaq Inatsisartut peqqussutaannut maanna atuuttumut naleqqiullugu malunnartumik arlalinnik allannguutinik imaqarpoq. Allannguutit taakkua ilai naatsumik ataani misissuataarneqarput:

FN-ip Innarluutillit pillugit Isumaqatigiissutaa
Innarluutillit pillugit Isumaqatigiissut inatsisissatut siunnersuummut pingaarnertut tunngaviuvoq. Siunnersuutip nutaap ilaa pingaarutilik tassaavoq, inummut annertuumik innarluutilimmut ikiorsiinissamik suliniuteqarnerit periarfissaanerat inummut innarluutilimmut pisinnaatitaaffiulernissaat.

Sullinniakkat
Inatsisip atuuttup akerlianik siunnersuummi aalajangersakkani ukioqatigiit tamarmik ilaapput. Taassuma saniatigut sullitat inunnit tarnikkut timikkullu annertuumik innarluutilinniit inunnut ataavartumik killilimmik atuisinnaasunut allanngortinneqarput.

Ilaquttanik ukkassineq namminerlu angerlarsimaffimmi isumassorneqarneq
Kissaatigineqarpat aamma suliamut tunngasutigut illersorneqarsinnaappat inuup innarluutip nammineq angerlarsimaffimminiiginnarsinnaanera siunnersuummi ukkanneqarpoq. Taamaalilluni ilaqutaasunut angerlarsimaffimmi ilaquttanik innarluutilinnik paarinnittunut malunnartumik pitsanngoriaatsinik maannakkut siunnersuut imaqarpoq.

Suliamik suliarinninnermi malittarisassat
Qulaajaaneq pillugu aaqqiinerit naleqqussarneqarnissaata saniatigut iliuusissatut pilersaarutinut tunngatillugu piumasaqaatinik aaqqiissuteqarnermik siunnersuut imaqarpoq. Siumut sammisumik nassuiaatit suliassamik ingerlatsinernut qanoq pingaarutigisut siunnersuummi takuneqarsinnaavoq. Inuup innarluutip ulluinnarni unammillernartut nalaassinnaasaasa aaqqiiffiginissaanut ilaqutaasut allallu qanigisaasut ilanngutitinneqartarnissaannut tunngatillugu iliuusissanik pilersaarutit suliarineqarneri aamma pingaarutilittut isigineqarpoq.

Kikkut tamarmik – kattuffiit inuillu – inatsisissatut siunnersuut saqqummiunneqartoq pillugu tusarniaanermut ull 8 novembarip tungaanut akissuteqarsinnaapput. Inatsisissatut siunnersuut Naalakkersuisut tusarniaanernut qarasaasiakkut isertarfianni pissarsiarisinnaavat tusarniaanerlu paasisaqarfiginerusinnaallugu:
https://naalakkersuisut.gl/kl-GL/Tusarniaanerit/Tusarniaanerit-ingerlasut

Paasisaqarnerorusukkuit taaguut Kirsten Olesen e-mailikkut: kiol@nanoq gl imaluunniit oqarasuaat: 34 66 57 attaveqarfigisinnaavat.