Kangerlussuup siunissaa pillugu suleqatigiissitaq ataatsimoortoq

Mittarfiit pillugit siunnersuut Ukiakkut Ataatsimiinnermi matumani suliarineqartussaavoq, tassanilu Inatsisartut ilaatigut Nuummi aamma Ilulissani mittarfiit tallineqarnissaat isummerfigisussaavaat. Siunnersuut Inatsisartuni amerlanerussuteqartunit taperserneqassappat, mittarfitta ilusaat allanngortussaapput. Tamanna Kangerlussuup ukioq kaajallallugu, nunatsinnut nunatsinniillu tikeraanik kisiartaasutut angallaffiusartup, Imarpik qulaallugu mittarfittut inissisimaneranut sunniuteqartussaavoq.

 

Ataasinngormat Ineqarnermut Attaveqaqatigiinnermullu Naalakkersuisoq Simon Simonsen Kangerlussuarmukarpoq, Kangerlussuarmi nunaqarfiup aqutsisui, Qeqqata Kommuniani borgmesteri Malik Berthelsen aamma Kangerlussuarmi najugaqartut ataatsimeeqatigiartorlugit, mittarfiit pillugit Inatsisartut aalajangiiniarnerannut suliaq pillugu ilisimatitsiartorluni, aammalu ataatsimoorluni nunaqarfiup siunissami napasinnaanissaanut qanoq iliortoqarsinnaanersoq oqaloqatigiartorlugit.

 

Ataatsimiinnerit ilaanni borgmesteri naapinneqarpoq.

 

”Isumassarsiorfiusut tamarmik suleqatigiissitamut ataatsimut, periarfissat tamarmik suunerinik aammalu siunnersuutit piviusunngortinneqarsinnaasut, taamaalillutillu aningaasaqarnikkut napatinneqarsinnaasut suunerinik misissuisussamut katersuutsinnissaat pisariaqartoq isumaqatigiissutigaarput”, Simon Simonsen naammagisimaarinnittoq ilisimatitsivoq nangillunilu:

 

”Kangerlussuarmi eqqaanilu, minnerunngitsumillu sumiiffiup ilaata Unesco-mit nunarsuarmi kingornussassatut toqqarneqarata kingorna takornariaqarnermik ineriartortitsinissamut periarfissat pitsaasuusut isumaqarpunga”.

 

Malik Berthelsen oqarpoq: Siullermik Simon Simonsen-ip Kangerlussuarmi periarfissat suunerannik nammineq isiminik takunnikkumanera aammalu ineriartortitsinissamik periarfissagissaarneranik upperinninnera pillugu nuannaarutigaara aammalu heliport-inngortinneqarani mittarfiup minnerpaamik 1500 meterimik takissuseqarnissaa Naalakkersuisunit kissaatigineqarnera iluarisimaarpara, malugeqqussavarali uagut 2810 meterisut takissuseqaannarnissaa piumasarigatsigu. 

Naggataatigut Naalakkersuisoq nersualaarpara Kangerlussuarmi susassaqartunik innuttaasunillu naapitsinissaminut piumassuseqarluarnera pillugu, innuttaasullu sinnerlugit qujaffigaara.

 

Ullup ingerlanerani Simon Simonsenip nunaqarfimmi aqutsisut aammalu innuttaasunik ataatsimiititsinermi innuttaasut ataatsimeeqatigai. Ataatsimiinnerni taakkunani marluusuni erseqqissaatigaa, mittarfiup qulimiguulinnut mittarfittut allanngortinneqarnissaa Naalakkersuisut politikkerinngikkaat.

 

”Aalajangiiniarnerup sivisunera nunaqarfimmi najugaqartunut kipiluttunartutut misigineqarnera paasilluarsinnaavara. Kisiannili mittarfissat pillugit aalajangiisoqariarpat, taamaalillutalu ataatsimoorluta suleqatigiissitami Kangerlussuup siunissaa pillugu pilersitsiviulluartumik oqaloqatigiissinnaalerutta, utaqqineq unissasoq neriuutiginarpoq”, Simon Simonsen naggasiivoq.

 

Suleqatigiissitaq pilersinneqartoq kommunimi aamma Namminersorlutik Oqartussani atorfilinnik inuttaqassaaq. Nunaqarfimmi aqutsisuniit aamma Arctic Circle Business-imit aallartitat ilisimasanik suleqatigiissitamut tapertaassapput.

 

Attaveqarfissaq: Naalakkersuisup allattaa Steve Sandgreen, mail: stes@nanoq.gl