2018-imi piniarnermut allagartamut pisanik nalunaaruteqarneq

Eqqaamallugu pisanik nalunaarsuiffik www.sullissivik.gl aqqutigalugu immersortalissagakku imaluunniit immersukkatit kommunerisanni Sullissivimmut tunniuttalissagakku, ukiuni siuliinitut pisanik nalunaarsuiffiit Aalisarnermut, Piniarnermut Nunalerinermullu Naalakkersuisoqarfimmut (APNN) nassiunnagu.

Ulloq manna tikillugu APNN pisanik nalunaarsuiffinnik 30-nik tigusaqarsimavoq, taakkulu kommunimut najugaqarfigisamut utertinneqassapput. Pisanik nalunaarsuiffinnik APNN-imut nassitseqataasimaguit taava illit nammineq www.sullissivik.gl aqqutigalugu imalunniit sumiiffinni Sullissivimmut saaffiginnillutit pisanik nalunaarsuissaatit, 2019-imullu piniarnermut allagartamik pillutit.

2017-imi februaarip aallaqqaataaniit sunngiffimmi imaluunniit inuussutissarsiutigalugu piniarnermut allagartamik www.sullissivik.gl aqqutigalugu imaluunniit kommunerisanni Sullissivimmut saaffiginninnikkut ingerlaannaq pisinnaanera atuutilernikuuvoq.

Tamanna inussiarnersumik eqqaasissutaavoq, tassa inatsit atuuttoq naapertorlugu nalunaaruteqarfissaq tassaammat oktobarip aallaqqaataaniit 15-iata tungaanut. Tamanna eqquutsinneqarpat 2019-imi januaarip aallaqqaataani piniarnermut allagartamik atuuttumik piffissaatillugu pinissaat qulakkeerneqassaaq.

Sukumiinerusumik paasisaqarusukkaanni immikkoortortaqarfimmi pisortaq Amalie Jessen attavigiuk, oqarasuaat 34 53 04, e-mail: amalie@nanoq.gl