Reykjavik-imi Kalaallit Sinniisoqarfiata pisortatigoortumik ammarneqarnera

Arfininngorneq 20. oktober 2018 Islandimi ulloq Kalaallit Nunaannut angisuujuvoq. Ullumikkut Reykjavik-imi Kalaallit Sinniisoqarfiat pisortatigoortumik ammarneqarpoq.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger-ip sinniisoqarfik ammarpaa tikilluaqqusillunilu oqalugiarluni Kalaallit Nunaata Islandillu qanimut atassuteqarnerat erseqqissarlugu, ilanngullugulu qaninnerusumik suleqatigiinnerunissaq ukunani ilaatigut taallugu, soorlu niueqatigiinneq, -takornariaqarneq, -kulturi, -ilinniartitaanerlu.

Inuit 150-t sinnerlugit ammaanermut peqataapput, kusanarlunilu tuppallernaqisumik. Ilaatigut politikerit soorlu Island-ip Nunanut Allanut Naalakkersuisua Guðlaugur Þór Þórðarson , USAmi Alaskamit Senatori Lisa Murkowski, Amerikap ilaanit Mainemiit Guvernøri Paul LePage kiisalu Islandip Præsidenterisimasaa Vigdis Finnbogadottir. Saniatigut peqataapput qaffasissumik inissisimasut atorfilittat, Islandip Kalaallit Nunaanni konsulia Skafti Jonsson, nunani avannarlerni ambassadørit, ilaalluni Qallunaat Nunaata ambassadøria Eva Egesborg Hansen, Savalimmiuni Sinniisoqarfiup ittua Pétur Petersen, EU-p ambassadøria Michael Mann, franskit issittumi ambassadøriat Segoléne Royal, tyskit ambassadøriat Herbert Beck, amerikamiut ambassademi atorfilittaat Jill Esposito, indiamiut ambassadøriat T. Armstrong Changsan, kineserit ambassadøriat Jin Zhijian allarpassuillu. Taakku saniatigut diplomatit atorfilittallu Islandimi najugallit peqataallutik.

Nuannerluinnarpoq nunaqqativut assigiinngitsunit sumiffinniit illoqarfinniillu Reyjkavikiliarsimammata Kalaallit Sinniisoqarfiata ammarneqarneranut peqataajartorlutik. Tulluusimaarnerat nuannaarnerallu takullugu nuannerpoq kalaallit pisortatigoortumik najuutilernerat aallaavigalugu”.

”Uanga isinnit isigalugu politikkikkut ataatsimullu isigalugu pisariaqarluinnarsimaneranik takutitsivoq, Kalaallit Nunaannit Islandimiillu eqqarsaatigalugu, taamaalillunilu Reykjavikimi sinniisoqarfeqalerniarluni aalajangersimaneq pissusissamisoorluinnarpoq” taama naggasiivoq Ane Lone Bagger.

Nipilersortunik kalaallinik inuusuttunnguanit pikkorissunit, ukuusunit Malu Rohmann Martin Fleischer, nuannerluinnartumik aamma aliikkusersorneqarpugut.

Akunnerit marluk ingerlanerani inuit 150-t peqataapput, amerlangaarmata Túngatá 5-ip affarliata allaffii atorneqartariaqarsimallutik.

Paasisaqarnerorusukkuit attavigiuk, sinniisoqarfiup ittua Jacob Isbosethsen (+354) 6655610

Assinik assiliisoq tassavoq Marc Jacobsen:

Islandimi Nunanut Allanut Naalakkersuisoq Guðlaugur Þór Þórðarson taavalu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger

Mainemi guvernøri, Paul LePage, taavalu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger

Alaskami senatori, Lisa Murkowski, taavalu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger



Aleqa Hammond Sara Olsvigilu Nunanut Allanut Sillimaniarnermullu Ataatsimiititaliami ilaasortat taavalu Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq, Ane Lone Bagger, Islandimi Kinamit ambassadøri, Jin Zhijanilu visitkortinik paallaasseqatigiittut.

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq, Ane Lone Bagger, Islandimi Japanimit ambassadøri, Yasuhiko Kitagawalu oqaloqatigiittut.



Air Greenlandimi pisortaaneq, Jacob Nitter Sørensen, taavalu Nukissiorfimmi pisortaaneq Michael Pedersen.

Nunat tamalaat akornanni ilisimatusarnermi sinniisut ammaanersiornermi ilasseqatigiinnermi aamma peqataapput.

Saamerlermiit:  Dr. Marc Lanteigne (University of New Zealand), Mingming Shi (University of Iceland), Reiko Tatematsu (Islandimi Japanimiut ambassadianni allatsi tullersorti), taavalu ilisimatusartoq Lau Øfjord Blaxekjær (Nordic Insitute of Asian Studies, Københavns Universitet).

Islandimi Sinniisoqarfimmi pisortaq, Jacob Isbosethsen, taavalu Islandimi Danmarkimit ambassadøri, Eva Egesborg.

Kalaallit Nunaanni ilisimatusartut ilaat aamma ammaanersiornermi ilasseqatigiinnermi peqataapput. Saamerlermiit: Lektori Thomas Ingeman-Nielsen (DTU), Josephine Nymand (Ilisimatusarnermut siunnersuisoqatigiiffimmi pisortaq), Morten Meldgaard (Ilisimatusarfimmi pisortaq), Gert Mulvad (Ilisimatusarfimmi ataqqinaammik doktori), Daniel Thorleifsen (Nunatta Katersugaasivia Allagaateqarfiani pisortaq).

Saamerlermiit: Ann-Sofie Stude (Islandimi Finlandimit ambassadøri), Eva Egesborg (Islandimi Danmarkimit ambassadøri), Yasuhiko Kitagawa (Islandimi Japanimit ambassadøri), Herbert Beck (Islandimi Tysklandimit ambassadøri).

Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq Ane Lone Bagger taavalu Michael Sfraga (Wilson Center’s Polar Initiativemi pisortaq).

Jörg Dietrich-Nackmayr (tyskit sakkutuut umiarsuaataanni orlogskaptajni) taavalu Mininnguaq Kleist (Bruxellesimi Sinniisoqarfimmi pisortaq).

Malu Rohmann taavalu Mika Fleischer aliikkusersuisuupput.