Ilisimatitseqatigiipput

Aalisarnermut, Piniarnermut Nunalerinermullu Naalakkersuisup Nikkulaat Jeremiassenip Naalakkersuisunngornerminit Royal Greenlandimi qullersat pingasunngornermi oktobarip 17-ianni 2018-imi ataatsimeeqatigeqqaarpai.

Nikkulaat Jeremiassenip aalisarneq pillugu inatsisissap suliarineqarnissaa pillugu ilisimatitsivoq, ilaatigullu oqaluttuaralugu suleqatigiissitamik pilersitsisoqarnissaa siunertarineqartoq. Suleqatigiissitami aalisarnermik inuussutissarsiuteqartut allallu aamma aalisarnermik sammisaqartut sinniisoqassasut.

Nikkulaat Jeremiassen oqarpoq suleqatigiissitap suliaasa inerneri aalisarneq pillugu inatsisissamut sunniuteqarluinnartussaasut.

Naalakkersuisup erseqqissarpaa aalisarnermik inuussutissarsiuteqarneq ineriartortinneqartuassammat naleqqussarneqartuassallunilu, aamma aalisarneq pillugu inatsisissaq sivisuumik attanneqarsinnaassasoq.

Aalisarnermut, Piniarnermut Nunalerinermullu Naalakkersuisup Royal Greenlandip saarullinnut uumatitsiveqartitsilluni aalisarnermik Maniitsumit Kangaatsiap eqqaanut suliniutaa iluarisimaarpaa.
Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. E-mail: jio@nanoq.gl