Sunngiffimmi ukioq manna aalisartartut tallimanngorpat kapisilinniarunnaassapput



Sunngiffimmi ukioq manna aalisartartut tallimanngorpat oktobarip 19-ianni 2018-imi kapisilinniarunnaassapput.

Sunngiffimmi ukioq manna aalisartartunut kapisilittassiissutit 10 tonsit tamakkerlugit aalisarneqarsimalermata sunngiffimmi aalisartartut tallimanngorpat oktobarip 19-ianni 2018-imi kapisilinniarunnaassapput.

Piffissap pineqartup kingorna kapisilinniarneq inerteqqutaalissaaq. Kapisilinnut qassutit tamarmik oktobarip 19-ianni 2018-imi qaqinneqareersimassapput, Kalaallit Nunaanni Aalisarnermut Akuersissutinik Nakkutilliisoqarfik taama ilisimatitsivoq.

Namminersorlutik Oqartussat nalunaarutaat naapertorlugu sunngiffimmi aalisartartut kapisilittatik Kalaallit Nunaanni Aalisarnermut Akuersissutinik Nakkutilliisoqarfimmut nalunaarutigisussaavaat.

Sunngiffimmi aalisartartut kapisilinniarnissamut akuersissuteqarlutik allagartallit kapisilinniaraluarlutik pisaqarsimanngitsut kapisilittanut nalunaarsuiffissaq 0-imik nalunaarlugu nassiutissavaat.

Nalunaarfissaq; KANUAANA, Postboks 501, 3900 Nuuk, Telefax 34 63 60 imaluunniit e-mail-ikkut uunga gflk@nanoq gl.

Kapisilittanut nalunaarsuiffissaq uani pineqarsinnaavoq: KANUAANA, imaluunniit immersuiffissaq nittartakkakkut ugguuna pineqarsinnaalluni: https://www.sullissivik.gl

Attavigineqarsinnaasoq: Kalaallit Nunaanni Aalisarsinnaanermut Akuersissutinik Nakkulliisoqarfimmi souchef, Niels J. Laursen. Mail: nijl@nanoq.gl