Tikaagullittassiissutit qipoqqartassiissutillu ammaanneqarnerat

Kitaani tikaagullittassiissutit qipoqqartassiissutillu sinneruttut oktobaarip 17-ianiit 2018-imi atuutilersumik ammaanneqarnerat

Kalaallit Nunaata Kitaani tikaagulliit qamutilimmik tuukkartalimmik pisassat 72-it, qoorortoorsornermilu pisassat 28-it kiisalu Kalaallit Nunaata Kangiani tikaagulliit qoorortoorsorluni pisassat 13-t oktobaarip 12-iani 2018-imi suli pisarineqarsimanngillat. Kitaani qipoqqartassiissutit 4-t aamma tikaagulliusaat 14-t sinnerupput.

Pisassiissutigineqartut tamakkerneqarnissaat qulakkeerniarlugu, Aalisarnermut, Piniarnermut Nunalerinermullu Naalakkersuisoq aalajangiivoq oktobaarip 17-ianiit 2018 atuutilersumik tikaagulliit pisassiissutigineqartunit sinneruttut 100-it Kalaallit Nunaata kitaani kommunit tallimaasuni ammaanneqassasut tikaagulliillu 13-t Kalaallit Nunaata Kangiani aqutsiveqarfinnut marlunnut ammaanneqassasut. Aammattaaq qipoqqaat sinneruttut sisamat oktobaarip 17-ianiit 2018 Kalaallit Nunaata kitaani kommunit tallimaasuni paggatassiissutigineqarneri ingerlaannassapput.

Angallatit qamutilillit taamatullu ataatsimoorluni piniarnermut peqataasut tikaagullinniarnermut aamma qipoqqarniarnermut teknikkikkut akuerineqarnikut nalunaarutini kinguliiniittuni piumasaqaatit malillugit tikaagullinniarnermi 1. martsimiit 30. novembarimut qipoqqarniarnermilu 1. januarimiit 31. decemberimut piniarsinnaapput.

Piniaqatigiinnermi siulersortimik akuersissummik pigisaqartumik aqunneqassaaq, taassumalu aamma akisussaaffigaa pisap kommunimut najugaqarfigisamut ingerlaannartumik nalunaarutigineqarnissaa.

Piniarnissani piumasaqaatit (www.lovgivning.gl)

Arfernik angisuunik piniarneq ukua malillugit ingerlanneqassaaq:
  • Arfernik angisuunik illersuineq pisallu pillugit Namminersorlutik Oqartussat nalunaarutaat nr. 12, 22. december 2014-imeersoq
  • Arfattat angisuut pissatallu nalunaarutigineqartarnerat pillugu Namminersorlutik Oqartussat nalunaarutaat nr. 12, 16. juli 2010-meersoq.
Paasissutissat sukumiinerusut pillugit attavigiuk: Immikkoortortaqarfimmi pisortaq Amalie Jessen, oqarasuaat: 34 53 04, e-mail: amalie@nanoq.gl