Innuttaasunut ilisimatitsissutit kalaalimineerniarfinni nerisassanik suliat pillugit

Naalakkersuisut 30. august 2018-imi immikkut akuersissuteqarlutik kalaalimineerniarfinnit nerisassanik suliarisat ilaannik tuniniaasinnaatitsilerput.

Qanittoq tikillugu kalaalimineerniarfinnit taamaallaat neqit aalisakkallu qerineqanngitsut taamaallaat pisariarineqarsinnaagaluarput. Immikkut akuersissuteqarnerup kinguneraa kalaalimineerniarfinnit aamma nerisassat uku piniartuneersut aalisartuneersullu tuniniarneqarsinnaalissammata:
  • Aalisakkat neqillu panertut
  • Aalisakkat neqillu qerisut
  • Aalisakkat neqillu tarajortikkat
  • Aalisakkat neqillu pujuukkat
Nerisassat suliat taaneqartut aalisakkat neqillu qerineqanngitsut assigalugit kalaalimineerniarfinnit tuniniarneqarsinnaalerput. Taamaalilluni inuussutissarsiutigalugu aalisartunut piniartunullu kalaalimineerniarfinnit tuniniaasartunut nerisassanik sulianik nioqqutissiorlutillu tuniniaasartunut piumasaqaatinik sukateriffigineqanngillat. Nerisassat inuussutissalerinermut oqartussanit nakkutigineqartassanngillat.

Kalaalimineerniarfinniit tunineqartartut nioqqutissiat eqqiluisaarnissaannut oqartussat killilimmik nakkutilliisaraluartut inuussutissarsiutigalugu aalisartut piniartullu kiisalu kalaalimineerniarfiit qulakkeerinnittussaatitaapput nerisassat tunineqartut peqqissutsimut ajoqutaannginnissaat. Taamaammat aamma inuussutissarsiutigalugu piniartut aalisartullu suli qulakkeertussaavaat nerisassat kalaalimineerniarfinnit tunisartakkami angallanneranni uninngatinneqarnerannilu illersorneqarsinnaasumik eqqiluisaartinnissaat.

Annertunerusumik paasisaqarusunnermit saaffigineqarsinnaavoq Uumasut nakorsaqarfik, Inuussutissalerinermullu Oqartussaaffik pisortaq Egill Steingrimsson, oqa. 34 50 00