Passussinermik suliffeqarfinnut ilisimatitsissut

Naalakkersuisut 30. august 2018-imi immikkut akuersissuteqarput, ilaatigut niuertarfiit inuussutissalerisut neqit ilaannik uumasunik nakorsanik nakkutigisoqartinnagit suliarineqarsimasunik tuniniaasinnaalersillugit.
Kalaallit Nunaanni Uumasunut Nakorsaqarfik aamma Inuussutissalerinermut Oqartussaqarfiup tusagassiutinut nalunaarutikkut ugguuna ilisimatitsissutiginiarpaa immikkut akuersinerup imaa pillugu kiisalu immikkut akuersissut qanoq paasisariaqarnersoq ersarissarlugu.
Uumasunik piniagassanut immikkut akuersissummi pineqartumi Suliffeqarfiit inuussutissaleriffiusut pillugit Namminersornerullutik Oqartussat nalunaarutaat nr. 21, 27. juli 1998-imeersumi § 32, imm. 2 aamma 3-mi aalajangersakkanik ilaqarpoq.
Immikkut akuersissut 1. september 2018-imit 2019-ip naanissaata tungaanut atuuppoq.
Immikkut akuersissummi niuertarfiit neqaarniarfillit illinnartuerniarfillillu neqinik uumasunit ukunanngaanneersunit tunitsivigineqarsinnaalersinneqarput:
  • Umimmaat nujuartat
  • Tuttut nujuartat
Nerisassanik taaneqartunik taamaallaat inuussutissarsiutigalugu piniartunit tunineqarsinnaapput.
Umimmannik tuttunillu uumasuutigineqartunit uumasut nakorsaannit neqaannik nakkutigineqarsimanngitsunit niuertarfiit suli tunitsiviusinnaanngillat.
Suliffeqarfiit qulaani nioqqutissanik tigooqqaarusuttut uumasunit piniakkanik suliaqartartutut akuersissummik qinnuteqassapput. Qinnuteqaat ataani allaqqasunik ilaqassaaq uungalu nassiullugu Kalaallit Nunaanni Uumasunut Nakorsaqarfik aamma Inuussutissalerinermut Oqartussaqarfik Uumasut@nanoq.gl.
Suliffeqarfiit akuerisaareersumik neqaarniarfillit/ illinnartuerniarfillit:
  • Nammineq nakkutilliinissamut pilersaarusiaq annertusisaq
    • Sulisut ilinniarsimanerannik uppernarsaatit (assersuutigalugu neqaarniaq)
    • Tunisinermi ilitsersuut sukumiisoq
    • Neqinik qerineqanngitsunik eqqortumik nalunaaqutsiisarnermut suminngaanneerneralu pillugit nassuiaat
    • Uumasup neqaanik suliarinninnissamut passussinissamullu immikkut periaatsit
Suliffeqarfiit nutaat ilisimatitsissutit makku aamma nassiutissavaat:
  • Suliffeqarfiup titartagartaa
  • Suliffeqarfiup initaasa pisataasalu assilineri
Annertunerusumik paasisaqarusunnermit saaffigineqarsinnaavoq Uumasut nakorsaqarfik, Inuussutissalerinermullu Oqartussaaffik pisortaq Egill Steingrimsson, oqa. 34 50 00