Nunani Avannarlerni ministerit oktoberimi Nunani Avannarlerni Siunnersuisooqatigiit ataatsimiinnissaannut piareersarput

Nordiske flag Ministerit suleqatigiissut (MR-SAM) septemberip arfernanni 2018 isiginnaarutikkut ataatsimeeqatigiipput, tassani Aningaasaqarnermut Nunanullu Avannarlernut Naalakkersuisoq Ilulissanit peqataavoq.

Ministerit suleqatigiissut (MR-SAM) Nunani Avannarlerni ministerit siunnersuisoqatigiivisa missingersuutaat 2019-imoortoq akuersissutigaat, taannalu Nunani Avannarlerni Siunnersuisooqatigiit Oslomi ataatsimiinnissaanni akuerisassanngorlugu ingerlateqqinneqarpoq. Missingersuutit ilaatigut Islandip 2019 siulittaasuuffeqarnissaanik imaqarput.

Piffissami 2019 Island siulittaasuuffimmik tigumminninnissaminni suliniutissanik pissanganartunik pingasunik saqqummiussaqarpoq. Suliniut siulleq Nunani Avannarlerni Issittumilu takornariaqarnermik imminut attassinnaasumik siunniussineruvoq. Suliniutip aappaa imaanit pisuussutsit atorluarnerisigut aningaasatigut annertusiartortitsinissamut tunngassuteqarpoq. Suliniullu kingulleq tassaavoq Avannaani inuusuttut siunissaat, tassani FN 2030 anguniakkamit aallaaveqarpoq.

Imminut attassinnaasumik takornariaqarnikkut suliniummi Kalaallit Nunaat peqataassaaq, tamannalu Naalakkersuisut takornariaqarnermut periusissiaanut tulluulluinnarpoq. Naalakkersuisoqarfinni suliaqarfinni assigiinngitsuni suliniutip aqutsisoqatigiivinut ilaasussat 2019 upernaavata ingerlanerani pilersinneqassapput.

”Ataatsimiinnermi Islandmini suleqatiga siulittaasuuffissami suliniutinut pingasunut pilluaqquara, kalaallillu tungaannit peqataanissamut periarfissiivoq. Imminut attassinnaasumik takornariaqartstineq Naalakkersuisut ukiuni aggersuni pingaarnersiuillutik sinaakkusersuinerata iluaniippoq”, Vittus Qujauquitsoq oqaaseqarpoq.

Ataatsimiinnermi 2020-mut missingersuutini pingaarnersiuinissaq aamma oqaluuserineqarpoq, tassani Danmark siulittaasuuffeqarpoq. Danmarkip 2020-mi siulittaasuuffeqarnerani Kalaallit Nunaat Savalimmiullu pingaarutilimmik inissisimapput, siulittaasuuffeqarnermilu suliassanik ingerlatsinissani peqataalluarsinnaalluni.

”Ataatsimiinnermi oqariartuutigaara Naalakkersuisunit 2020-mut siulittaasuuffimmut suliassani politikkimut tunngassutilinni peqataassalluta piareersimasugut. Tamanna ilaatigut tassaasinnaavoq umiarsuarnut aalisarnermullu tunngassuteqartut, taamatullu teknologip pitsanngoriartornerani inuussutissarsiornikkut piumasaqaatit nutaat pilersitaat nunat avannarlermiut ataatsimut suliniutissaattut ineriartortinneqarsinnaasoq” taama Nunanut Avannarlernut Suleqateqarnermut Naalakkersuisoq Vittus Qujauquitsoq naggasiivoq.

Maanna ministerit suleqatigiissut Nunat Avannarliit Siunnersuisooqatigiivisa septembaerip 29-annit novemberip aallaqqaataanut 2018 Oslomi ingerlanneqartussamut piareersarput. Statsministerip ataatsimeeqatigiinnissaat sioqqullugu avatangiisinut silallu pissusaanut ministerit siunnersuisooqatigiivi aammalu kulturimut ministerit siunnersuisooqatigiivi ataatsimeeqatigiissapput.


Annertunerusumik paasisaqarusukkuit Nunani Avannarlerni suleqatigiinnermut Naalakkersuisumut allatsi attavigineqarsinnaavoq Pilunnguaq M. Poulsen, pilu@nanoq.gl aamma attavigineqarsinnaavoq Nunanut allanut Naalakkersuisoqarfik Immikkut siunersorti, upap@nanoq.gl