Meeqqanut ulloq unnuarlu paaqqinniffiit pillugit nalunaarut iluarsaataq tusarniutigalugu nassiunneqarpoq

Meeqqanut ulloq unnuarlu paaqqinniffiit pillugit nalunaarut iluarsaataq Isumaginninnermut Inatsisinillu Atuutsitsinermut Naalakkersuisoqarfiup 4. oktober 2018 tusarniutigalugu nassiuppaa.

Nalunaarutissatut saqqummiussap nutaap nammineq ineqarnissamik piumasaqaatip saneqqunneqarsinnaanera periarfissippaa. Tamatumunnga tunngaviuvoq tamanna pisariaqartinneqartoq paasinarsimmat, tassami meeqqat inissinneqarsimasut amerlasuut qatanngutiminnik ineqateqarneq sungiusimavaat, taamaammallu meeqqanik allanik ineqateqarnissaq toqqissisimanartinnerpaajullugu. Taamaattoq erseqqissaatigineqassaaq aallaavik ersarissoq tassaammat, meeqqap kissaatippagu nammineq ineqarnissaq, taava meeqqat ataasiakkaat nammineq ineqartinneqassapput.

Taassuma saniatigut aaqqissuussinissamut piumasaqaatit pillugit immikkut akuersissuteqartoqarsinnaasoq nalunaarummi periarfissinneqarpoq. Ulloq unnuarlu paaqqinniffiit pioreersut nalunaarutip atuutilinnginnerani aaqqissuussinissaminnut piffissaqarnissaminnik periarfissaqartitaasimannginnerat tamatumunnga tunngaviuvoq. Qinigassaq alla ajoraluartumik ulloq unnuarlu paaqqinniffiit arlallit matuneqarnissaminnik aarlerinartorsiulernerannik kinguneqassagaluarpoq. Meeqqat ulloq unnuarlu paaqqinniffimmiittut, toqqissisimanartumit aalajangersimasumillu sinaakkutalimmit pisariaqartitaminnit, matusisoqassagaluarpat nuunneqassagaluarput, taamatuttaaq ulloq unnuarlu paaqqinniffinnik matusinerit, meeqqanut, angerlarsimaffimmik avataanut inissinneqarnissamik pisariaqartitsisunut, inissat ikinnerulernerannik kinguneqassagaluarluni.

Meeqqanut ulloq unnuarlu paaqqinniffiit pillugit nalunaarutip iluarsaanneqarneranut siunertaasoq taamaalilluni tassaalerpoq meeqqanut inissinneqarsimasunut maannakkut atugassarititaasut pitsanngortinneqarnissaat attanneqarnissaallu.

Paasisaqarnerorusukkuit inatsisilerinermut immikkoortumi pisortaq Trine Foldager e-mailikkut: trif@nanoq.gl imaluunniit oqarasuaat: 34 66 33 atorlugu attavigiuk.