Aarluit pillugit siunnersuut


Misissuinermit annertuumit nutaamit ersersinneqarpoq Tasiilap eqqaani aarluit avatangiisinik mingutsitsisunik PCB-mik kviksølvimillu assut mingutsinneqarsimasut. Tamanna pissutigalugu misissuinermi ilisimatuut aarluit inunnit nerineqartannginnissaat siunnersuutigaat. Siunnersuut tamanna Nerisaqarnermut Timigissarnermullu Siunnersuisoqatigiinnit taperserneqarpoq kaammattuutigineqarlunilu innuttaasut aarluttortannginnissaat.

2009-miilli Tasiilap ungasinngisaani aarlunniartarneq nalinginnaalersimavoq. Tunumi aarluit pisarineqarsimasut sananeqaataannik ilisimatusarnermit ersersinneqarpoq Islandimi Norgemilu aarlunnut eqqarliusut. Iisaannik misissuinermi ersersinneqarpoq Islandimi Norgemilu aarluit aalisagartortartut assiginagit nunatsinni aarluit imarmiunik miluumasunik nerisaqartut.

Aarluit orsuinik misissueqqissaarnermi nerisaqarnikkut assigiinngissut tamanna qanittukkut paasineqarpoq, tassanngalu erserpoq nunatsinni aarluit affaat imarmiunik miluumasunik nerisaqartuusut. Paasisaq tamanna aamma PCB-p annertussusaanit ersersinneqarpoq, tassannga ersermat Tasiilami aarluit pisarineqartartut Islandimi Norgemilu aarlunnit annertunerujussuarmik mingutsinneqarsimasut.

Aarluit ilaat annertoorujussuarmik taaneqarsinnaasumik PCB-mik akoqarput. Tunumi aarluit PCB-mik akui natsip akuinit 100-riaammik qaffasinnerupput. (Najoqqutarisaq Pinngortitaleriffik.) Taamatuttaaq kviksølvimut tunngatillugu aarluit natsimut sanilliullugu 100-riaammik akoqarnerupput.

Aarluit avatangiisinit annertuumik mingutsinneqarsinnaanerat pissutigalugu aarlunnik nerineq inunnik ima mingutitsitigisinnaavoq kinguaariit tulliuttut kingunerlutsitsisinnaallutik. Taamaattumik aarluit inunnit nerisarineqannginnissaat siunnersuutigineqarpoq.

Meerartaarnissamik kissaateqartut kaammattuut tamanna eqqumaffigeqqissaartariaqarpaat, mingutsitsinerup sunniutaa annertunerpaaq kinguaariinni tulliuttuni takuneqarsinnaassammat.

Inuit aarluttorsimasut misissorneqarput, inernerili suli paasineqarsimanatik. Ilimagineqarsinnaavoq ima mingutsinneqarsimatigissasut aarluit ataatsimut isigalugit inunnit nerineqannginnissaat kaammattuutigineqassalluni.

Paasisaqarnerujumallutit attavigikkit:
Gert Mulvad, Kalaallit Nunaanni Nerisaqarnermut Timigissarnermullu Siunnersuisoqatigiinni siulittaasoq, gm@peqqik.gl
Egill Steingrimsson, Kalaallit Nunaanni Uumasunut Nakorsaqarfik Inuussutissalerinermullu Oqartussaqarfik (UNIO), uumasut@nanoq.gl