Nunat Avannarliit Killiit takornariaqarnermut saqqummersitsineranni nunatsinnit peqataasorpassuit


Nunat Avannarliit Killiit takornariaqarnermut saqqummersitsineranni nunatsinnit peqataasorpassuit
Ulluni makkunani ukiumoortumik takornariaqarnermut saqqummersitsinermi Vestnorden Travel Martimi, Akureyrimi Islandimiittumi ulluni 2.-4. oktoberimi ingerlanneqartumi Inuussutissarsiornermut Nukissiuuteqarnermullu Naalakkersuisoq Aqqalu Jerimiassen peqataavoq.

Kalaallit Nunaannit ilaatigut peqataapput Visit Greenland, nunami sumiiffinnit tamanit takornariaqarnermik suliaqartut, nunap ilaani takornariat tikiffissaannut ingerlatseqatigiiffiit, timmisartortitsileqatigiiffiit allallu.

Taamaalilluni takornariaqarnermik saqqummersitsinermi ukiormanna peqataasut 500 missaanniittut Promote Iceland ilisimatitsivoq, Kalaallit Nunaanniillu peqataasut 60-it missaaniipput.

Ilaatigut nunat taakku pingasut takornariaqarnermut siunnersuisooqatigiiffiinit – Visit Greenlandimit, Visit Icelandimit aammalu Visit Faroe Islandsimit – saqqummersitsinerni, ilaatigullu takornariaqarnermut tunisassiat pisiarineri tunisarinerilu pillugit isumaqatigiissutinik atsiuiniarlutik pisisartut tuniniaasullu B2B-mik ataatsimeeqatigiinnerinik arlalippassuarnik aaqqissuussat ingerlanneqarput.

Nunatsinnit peqataasut aammattaaq suliaqartartut ataatsimiinneranni Inuussutissarsiornermut Nukissiuuteqarnermullu Naalakkersuisoq Aqqalu Jerimiassenip ukiuni aggersuni Naalakkersuisut takornariaqarnermut pilersaarutaannik, tassani ilanngullugulu 2019-ip qeqqani naammassineqartussami nunamut namminermut takornariaqarnermut periusissiassap suliarinerani nunap ilaanik tamanik peqataatitsinissaq, ilisimatitsissutiginerani peqataapput.

Takornariaqarnermut suliassaqarfiup ineriartortinnissaanut pilersaarutinik, aammalu siunissami nittarsaassinermik suliassarpassuit ingerlanneqartussat Visit Greenlandip saqqummiuppai. Timmisartortitsileqatigiiffiit Air Greenland aamma Air Iceland ilaatigut takornariat amerlanerulernissaat anguniarlugu timmisartuussinissamik pilersaarutitik ilisimatitsissutigaat. Tamakku saniatigut nunap ilaani takornariat tikiffissaannut ingerlatseqatigiiffinnit Kalaallit Nunaanni takusassaqqissunit amerlaqisunit pissanganartunik saqqummersitsisoqaqattaarpoq.

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq:
- Kalaallit Nunaannut takornariat amerliartornerat takusinnaagatsigu nuannaarutissaavoq. Siuariarneq timmisartukkut taamatullu umiarsuarnik takornariartaatinik angalasuni takuneqarsinnaavoq. Taamaalilluni Vestnorden Travel Martimi amerlasuunit peqataasoqarnera nunani tamalaani Kalaallit Nunaata takornariat tikitassaattut nittarsaassinermik suliaqaqqinnermi ilorraap tungaanut alloriarneruvoq.

Annertunerusumik paasisaqarusunnermi saaffigineqarsinnaavoq Naalakkersuisoqarfiup pisortaa Jørn Skov Nielsen, Inuussutissarsiornermut Nukissiuuteqarnermullu Naalakkersuisoqarfik, oq. +299 55 61 88, e-mail: jsn@nanoq.gl