Mittarfiliassani ataatsimoortitani inuiaqatigiit aningaasaqarneranni naatsorsuinerit suliarineqarnerannut nassuiaatit

Allattoq Simon Simonsen, Ineqarnermut Attaveqaqatigiinnermullu Naalakkersuisoq


Maannakkorpiaq mittarfiit takinerunissaannut siunnersuut pillugu annertuumik oqallittoqarpoq. Tamanna pissusissamisoorpoq, tassami siunnersuutip kingunerisaanik maannakkut angalariaatsitsinnut sanilliullugu annertuunik allanngortoqartussaavoq. Tamanna tusagassiuutitigut allaaserisanik ilanngutassianillu arlalinnik pilersitsiviuvoq, kiisalu amerlasoorpassuit tusagassiuutini oqaaseqartarfinni isummersorlutik.
Oqallinnermi isummersornerit saqqummertut amerlanersaat, isummersortoq suliassamut tapersiinersoq akerliunersorluunniit apeqqutaanani, pissusissamisoorput tunngavissaqarlutillu. Tamanna naleqqulluinnarpoq. Kisianni paarlattuanik Namminersorlutik Oqartussat aamma siunnersorteqarfiit suleqatigisavut naatsorsuinernut, mittarfiliassanut ataatsimoortitanut tunngavigineqartunut, tamanut saqqummiunneqareersunut unneqqarinngitsumik inerneqartitsisimasut, pasitsassaarinernik saqqummiussisarneq naleqqutinngilaq. Tamanna ilumuunngilluinnarpoq. Naamerluinnaq.

Naatsumik oqaatigisinnaavara, periaatsimi inuiaqatigiit aningaasaqarneranni naatsorsuinernut tunngaviusumi, nunani tamalaani malitassat aallaavigineqarmata, tassalu ”Inuiaqatigiit aningaasaqarneranni sunniutaasussanik nalilersuinermi ilitsersuut”, Danmarkimi Aningaasaqarnermut ministereqarfimmit saqqummersinneqartoq, aamma ”Inuiaqatigiit aningaasaqarneranni sunniuteqaatissanik naliliinermi saqqummiussinissamut ilitsersuut”, Aningaasaqarnermut Nunamullu Namminermut Naalakkersuisoqarfimmit suliarineqartoq.

Naatsorsuinerpiaat suliarineqarnerannut ilaatigut nunani tamalaani ilisimaneqarluartoq siunnersorteqarfik, Deloitte, taamatut ilusilinnik naatsorsuinernik annertuumik misilittagaqartoq, suleqatigaarput. Taanna ilaatigut suliassanut angisuunut, soorlu Danmarkimi Femern-bæltet aamma Island-imi mittarfimmik allilerineq, inuiaqatigiit aningaasaqarneranni nalilersuinernik suliaqarsimavoq. Tassani periaatsitigut aallaavigineqartut, atorsimasatta assingi, atorsimavaat.
Taamatut oqaaseqarlunga neriuutigaara siunissami oqallinneq – periaatsitsinnut suliaqarnermut nassuiaatit matuma siuliani taaneqartut kingunerisaannik, naatsorsuinitsinni unneqqarissimanngitsugut pasitsassaarisoqarani - mittarfiliassat ataatsimoortitat pingaaruteqartortaannut tunngassuteqalissasoq. Tamannami naapertuilluanngilaq.

Taamatut kaammattuillunga mittarfiliassat ataatsimoortitat imarisai pillugit oqallinnermi peqataanissara qilanaaraara.

Annertunerusumik paasisaqarusunnermi saaffigineqarsinnaavoq: Steve Sandgreen Mail: stes@nanoq.gl mobil: 59 66 59