Islandip Kalallit Nunaatalu ukiumoortumik ataatsimeeqatigiinnerat High Level Officials Meeting Nuummi iluatsilluarpoq


Islandip Kalallit Nunaatalu ukiumoortumik ataatsimeeqatigiinnerat High Level Officials Nuummi ullormi 27. september 2018-imi ingerlanneqarpoq. Ukiumoortumik ataatsimeeqatigiinnerit Islandip Kalaallit Nunaatalu Joint Declaration/ataatsimut nalunaarutaat 2013-imeersup malittaatut atorfilittatigoortumik ingerlanneqartarput.

Nalunaarutip ilaatigut siunertaraa Islandip Kalaallit Nunaatalu aalisarnikkut, peqqinnissakkut, takornariaqarnikkut, niuernikkut inuussutissalerinikkullu suleqatigiinnerisa annertusarneqarnissaat. Suleqatiginnerup pineqartup ilaatut Islandip Kalaallit Nunaatalu silaannakkut angallannermi suleqatigiinnerat pitsanngorsaaffiginissaannut periarfissanik misissuisussamik suleqatigiissitamik pilersitsisoqarnikuuvoq. Nuummi ataatsimiinnermi suleqatigiissitami ilaasortat ilisimatitsissutigaat Islandip Kalaallit Nunaatalu akornanni silaannakkut angallannermi suleqatigiinnermi pitsanngoriaataasinnaasut pillugit inassuteqaatitalimmik nalunaarusiortoqarsimasoq, nalunaarusiarlu massakkut naalakkersuinikkut isummerfigineqartussanngortinneqarsimasoq.

Nunat marluusut aalisarnikkut, peqqinnissakkut, takornariaqarnikkut, niuernikkut inuussutissalerinikkullu suleqatigiinnerinut tunngassuteqartunik Islandimiut Kalaallillu ataatsimiinnermi saqqummiussipput. Kalaallit Nunaata Reykjavikimi aallartitaqarfissaata ammarnissaa illuatungeriit qilanaaraat.

Nunat Avannarliit Ministeriisa Siunnersuisoqatigiivini Issittumilu Siunnersuisoqatigiinni Islandimiut piffissami aggersumi siulittaasunngorpata suleqatigiinnerulernissat atorfilittatut suleqatigiit qilanaaraat.

Ataatsimiinneq naggaserlugu illuatungeriit isumaqatigiissutigaat ilaatigut ilinniartunut tunngatillugu Islandip Kalaallit Nunaatalu akornanni paarlaasseqatigiittarnerit annertusarnerisigut aammalu Islandimi Nunanut Allanut Ministeeriaqarfimmi Namminersorlutillu Oqartussat Nunanut Allanut Naalakkersuisoqarfianni sulisut piginnaasaanik qaffassaarisoqarniarluni misilittakkanillu paarlaasseqatigiittarnerit annertusarnerisigut angusassanik misissuisussamik suleqatigiissitaliortoqassasoq.

Annertunerusumik paasisaqartoqarniaruni immikkoortortami pisortaq Jacob Isbosethsen +299345152 aamma generalkonsul Skafti Jonsson +299348380 attavigineqarsinnaapput.