Issittoq pillugu isumaqatigiissut Kalaallit Nunaanni atsiorneqarpoq


Issittup Imartaata qiterpasissuani aalisarneq pillugu nunat tamalaat isumaqatigiissutaata atsiorneqarnissaanut atatillugu nalliuttorsiualaarnermi Aalisarnermut, Piniarnermut Nunalerinermullu Naalakkersuisoq ullumi qaaqqusisuuvoq.

Nalliuttorsiualaarneq Ilulissani Hotel Arctic-imi, ministerinit, ambassadørinit naalagaaffiillu atsioqataasut 10-usut naalakkersuisuisa aallartitaanit peqataaffigineqarluni ingerlanneqarpoq.

Nunat atsioqataasut tassaapput Canada, USA, Rusland, Norge aamma Kunngeqarfik Danmark Savalimmiut Kalaallit Nunaallu sinnerlugit, Island, EU, Sydkorea, Japan aamma Kina.

- Ullumikkut naalagaaffiit issittumiittut naalagaaffiillu issittumiinngitsut akornanni issittoq pillugu isumaqatigiissuteqartoqarpoq: Oqaluttuarisaaneq eqqarsaatigalugu aatsaat taamaaliortoqarpoq. Isumaqatigiissutip Kalaallit Nunaanni atsiorneqarnera tulluussimaarutigaara.
Naalagaaffiit peqataasut tamarmik atsiorneratigut isumaqatigiissutip piviusunngortinnissaanut, siunissami ilisimatuussutsikkut suleqatigiinnissamut peqataanissatsinnut aamma siunissami issittup imartaata qiterpasissuani nungusaataanngitsumik aalisarnissamut sulissuteqarnissamut pisussaaffeqalerput.

Isumaqatigiissut manna aqqutigalugu mianerinnillunilu periuseqarnerup atorneratigut nunarsuarmi imartami aalisarfiunngitsumi kingullermi siiunissami aalisartarnissanut peqqissaarnissarput takutipparput. Neriuppunga upperaaralu nunarsuatta imartaanni nungusaataanngitsumik aalisartoqartannginnerata nunarsuaq tamakkerlugu sammineqarnerulernissaanut tamanna isumassarsiffiulluarumaartoq.

Issittup imartaata qiterpasissuani aalisarneq pillugu aalajangiinerni nunat sineriallit tamarmik isumaqatigiissuteqaqqaarnissaat Kalaallit Nunaannut pingaaruteqarsimavoq. Imartat aningaasarsiornikkut immikkut oqartussaaffigisat (EEZ) killeqarfii tikillugit siunissami aalisarnermik ingerlatsineq pillugu aalajangiiniarnerni sunneeqataasinnaanissarput pingaaruteqarpoq.

Isumaqatigiissummi nunat inoqqaavi ilanngunneqarnerat naammagisimaarluinnarpara. Manna isumaqatigiissut aqqutigalugu nunat inoqqaavi inuillu najugaqartut ilisimasaasa ilanngunneqartarnissaasa pingaaruteqassusaat Issittumilu akisussaaqataanitta pingaaruteqassusaa takutinneqarput. Inuit najugaqartut ilisimasatoqaat ilisimatuussutsikkullu ilisimasanut ataqatigiissillugit isumaqatigiissummi ilaatinneqarneri pingaaruteqartutut iluatsilluartutullu isigaakka,

Taama Naalakkersuisoq Erik Jensen oqaaseqarpoq

Isumaqatigiissummi pingaarnerit
- Nunap immikkoortuini aalisarnermut aqutsiveqarfimmik aaqqissuussamik, aalisarnermut aalisakkanik pisassiissutinik malittarisassanillu ilisimatusarnermik tunngaveqartumik aalajangersaasussamik pilersitsinissaq pillugu isumaqatigiittoqartinnagu, issittup imartaata qiterpasissuani aalisartoqassanngitsoq;

- Issittup imartaata qiterpasissuani pinngortitami uumasut nerisaqaqatigiinneri ataqatigiinnerilu aalisagaqassutsimilu allanngornerit pillugit ilisimasaqalersitsisumik siunissaq ungasinnerusoq isigalugu ilisimatusarnikkut suleqatigiinnerup patajaallisarnissaa;

- Issittumi nunap inoqqaavisa soqutigisaat, aalajangiiniarnerni nunap inoqqaavisa najukkamilu inuit ilisimasaasa naleqassusiat aamma suliap ingerlaqqinnerani nunap inoqqaavisa najukkamilu inuit najugallit peqataanissaasa qulakkeerneqarnissaat akuersissutigissallugit;

- Piujuartitsinissamut aqutsinermullu aaqqiissuteqarnerit pillugit peqataasut aalajangersagaat naapertorlugit aalajangersakkat eqquutsinnerisigut misileraalluni aalisarneq taamaallaat ingerlanneqassaaq;

- Aalajangiiniarnerni peqataasut tamarmik isumaqataassapput;

- Isumaqatigiissut nunat tamarmik atortussanngortippassuk atuutilissaaq.

Attaveqarfissaq; Jørgen Isak Olsen, Aalisarnermut, Piniarnermut Nunalerinermullu Naalakkersuisoqarfimmi pisortaq Email: jio@nanoq.gl
Copyrights: Kortet: © Ocean Conservancy,