Ukiuni 25-ni imermit nukissiorfeqarneq septembari ulluisa 30-anni nalliuttorsiuutigineqassaaq


Inuussutissarsiuteqarnermut Nukissiuuteqarnermullu Naalakkersuisup Aqqalu Jerimiassenip Nunatsinni ukiuni 25-ni imermit nukissiuuteqarsimanerata nalliuttorsiutigineranut kikkut tamaasa qaaqquai. Aaqqissuussineq Nuup Katersortafiani sapaammi septembari ulluisa 30-anni 2018, nalunaaqutaq marlunniit tallimat tungaannut ingerlanneqassaaq.

Utoqqarmiut Kangerluarsunnguanni Imermik Nukissiorfik 1. oktobari 2018, 25-nik ukioqalissaaq. Imermik nukissiorfik, Nuummik innaallagissamik aamma kiassaanermik pilersuisoq, 1993-imili atoqqaartinneqarmat imermit nukissiorfiit Sisimiunit, Tasiilamit, Qaqortumit, Narsamit aamma Ilulissanit pilersuisut pilersinneqarput.
- Imermit nukissiorneq nunatsinni inuiaqatigiinnut annertuumik pingaaruteqartoq nalliuttorsiuutigissallugu pissutissaqarluarpoq, Inuussutissarsiuteqarnermut Nukissiuuteqarnermullu Naalakkersuisoq, oqaaseqarpoq nangillunilu:

- Siunissami imermit nukissiorneq aamma ataavartumik tunngaveqartumik nukissiornermut teknologiit allat nunarput tamakkerlugu suli annertunerusumik atorneqalissapput.

Aaqqissuussineq Nuup Katersortarfiani ingerlanneqartoq Inuussutissarsiornermut Nukissiuuteqarnermullu Naalakkersuisup Aqqalu Jerimiassenip aamma borgmesterip tullia siulliup Randi Vestergaard Evaldsenip, kiisalu Nukissiorfiit pisortaanerata Michael Petersenip oqalugiarnerinit aallarnerneqassaaq.

Maalia & Nukannguaq nuannersunik nipilersussapput aamma Hinnarik meeqqanut meerarpaluttunullu aliikkusersuissaaq. Kaffi, tii aamma kaagit iisarissaarutiginerisa saniatigut aammattaaq Nukissiorfiit Nunatsinni imermit nukissiorneq pillugu filmiutaasa nutaat takunissaannut Nukissiorfinnilu sulisut nukissiorneq pillugu oqaloqatiginnissaannut periarfissaqarpoq.

Neriuppugut nalliuttorsiornermut amerlasuut takkukkumaartut. Katersortarfimmut takkussinnaanngitsut tamarmik Nukissiorfiit nittartagaanni nutaami www.nukissiorfiit.gl aamma Facebookimi nalliuttorsiorneq malinnaaffigisinnaavaat.

Annertunerusumik paasissutissarserusuttut attavigisinnaavaat:
Naalakkersuisoqarfimmi pisortaq Jørn Skov Nielsen, Inuussutissarsiornermut Nukisssiuuteqarnermullu Naalakkersuisoqarfik, tlf. +299 55 61 88, e-mail: jsn@nanoq.gl