Attaveqaqatigiinneq pillugu Isumasioqatigiinnerit

Simon Simonsen Attaveqaqatigiinneq pillugu Isumasioqatigiinnerit: ”Sumiiffinni susoqarnera tusarnaarlugu pissarsiaqarnarpoq”


Attaveqaqatigiinneq ataatsimoorussarput ulluinnarni inuunitsinnut annertuumik pingaaruteqarpoq. Mobilinnit sianeruit, sinersortaammut ilaaguit mittarfimmulluunniit mikkuit attaveqaqatigiinneq ataatsimoorussarput atussavat. Attaveqaqatigiinneq tamatsinnut tunngasuunera pissutigerpiarlugu atuisartorpassuit ullut tamaasa attaveqaqatigiinnermik ataatsimoorussatsinnik atuisartorpassuit tusarnaarnissaat pingaaruteqarpoq.
Taamaammat Ineqarnermut Attaveqaqatigiinnermullu Naalakkersuisoq Simon Simonsen kommunit peqatigalugit kujataani Qaqortumiit avannaani Ilulissat aamma Qasigiannguit tikillugit sapaatit akunnerini kingullerni marlunni attaveqaqatigiinneq pillugu isumasioqatigiinnernik arlalinnik ingerlatsisimavoq. Ineqarnermut Attaveqaqatigiinnermullu Naalakkersuisoqarfimmiit kommunimiillu saqqummiussinerit saniatigut Air Greenland, Disko Line, Mittarfeqarfiit kiisalu aamma kommunini pineqartuni inuussutissarsiortut sinniisaannit ilaatigut saqqummiussisoqartarpoq.

- Isumasioqatigiinnerit assut pissarsinarput. Nunap immikkoortuini qanoq pisoqarnersoq toqqaannartumik inunnit tusassallugu tamatigut soqutiginartarpoq
, Ineqarnermut Attaveqaqatigiinnermullu Naalakkersuisoq naammagisimaarinnippaluttumik oqarpoq nangillunilu:

- Maluginiarpara kommunit sumiiffinni pissutsinut sunniuteqartussanik aalajangiisoqassatillugu, nalinginnaasumik akuutinneqarnerorusuttut. Tamanna eqqaamaniassavara.
Mittarfiit pillugit oqallinneq maanna ingerlanneqartoq aammalu angallassinermut isumaqatigiissutit najuuttorpassuit akornanni pingaarnertut sammineqarput oqaaseqarfigineqarnerpaallutillu:

- Tupinnanngilluinnarpoq sammisat taakku amerlasuunit soqutigineqarmata. Sammisat taakku inuit ulluinnarni inuunerannik allanngortitsereerput imaluunniit allanngortitsissussaapput. Taamaammat apeqquterpassuit paasiuminaatsut ilaatigut mittarfiliornissanut siunnersuummiittut nassuiarnissaannut periarfissaqarsimagama nuannaarutigaara
, Simon Simonsen naggasiivoq.

Manna tikillugu isumasioqatigiinnerit sisamat ingerlanneqarsimapput Qaqortumi, Maniitsumi, Qasigiannguani aamma Ilulissani. Kingusinnerusukkut aamma Kommuneqarfik Sermersuumi assinganik isumasioqatigiisitsisoqassaaq. Isumasioqatigiinnerit tamarmik peqataaffigineqarluarsimapput.
Naalakkersuisup Simon Simonsenip ulluni 6. aamma 7. Oktobari 2018 Inatsisartuni ilaasortat attaveqaqatigiinneq pillugu isumasioqatigiinnissamut qaaqqusimavai, tassanilu kommunini isumasioqatigiissimanerit tunngavigineqassallutik.

- Misigisimavunga kommunini ataatsimiinnerit peqataaffiginerisigut pissutsit suut kommunini pingaartinneqarnersut paasisaqarfigilluarsimallugit, ukiamullu ataatsimiinnerup nalaani Inatsisartuni ilaasornut attaveqaqatigiinneq pillugu isumasioqatigiisitsinissap ingerlannissaa qilanaaraara.


Attaveqarfissaq: Steve Sandgreen, Naalakkersuisup allattaa
Mail: stes@nanoq.gl aamma mobil: 345458