Eqqagassalerinermi nuna tamakkerlugu aaqqiissut nutaaq

Naalakkersuisut borgmesterillu tamarmik isumaqatigiipput kommunit ataatsimoorlutik eqqagassalerinermut selskabimik pilersitsissasut, selskabip taassuma eqqakkanik ikuallaaviit marluk, uuliakunillu ikuallaaviit pingasut nuna tamakkerlugu sullissisussanngorlugit pilersinneqartussat ingerlatissavai

Ikuallaaviit ikuallassinnaasaat 30%-imik sinnerlugit ullumikkut eqqagassanik pilersitsisarpugut. Taamammat ingammik nunaqarfinni illoqarfinnilu mikinerusuni eqqagassat suneqanngitsut peqqinnissamullu ajoqutaasut amerliartuinnarput. Tassunga ilutigitillugu ikuallaaviit pioreersut pujoq naammattumik salissinnaanngilaat.

 

Naalakkersuisut borgmesterillu tamarmik taamaammat isumaqatigiissutigaat peqqinnissaq avatangiisillu eqqarsaatigalugit sumiiffinni ikuallaaviit mikinerit atorunnaarlugit marlunnik angisuunik ikuallaaviliortoqassasoq naammattunik toqqorsivilinnik, taamaalilluni nuna tamakkerlugu eqqagassat nuna tamakkerlugu ikuallaavissanut assartorneqarsinnaassallutik.  

- Nuannaarutigilluinnarpara eqqakkat uuliallu igitassat avatangiisinut mingutsitsinannginnerusumik kiisalu kiassarnikkut iluaqutigineqarsinnaasumik ikuallanneqartalernissaat anguniarlugu nuna tamakkerlugu aaqqissuteqartoqartussannngormat. Eqqagassat eqqortumik poortorneqarlutillu assartorneqartalerpata assersuutigalugu plastikkit pinngortitamut immamullu teqqarsinnaanerat annikinnerulissaaq. Eqqakkanillu ikuallaavinni anginerusuni eqqakkat pissusissamisoornerusumik isumagineqarsinnaalissapput, pujorlu salilluagaanerulersinneqarsinnaalluni. Aaqqiissutissat nutaat nuna tamakkeerlugu atuuttussat avatangiisinut, peqqissutsimut mingutsitsinannginnerusumilllu nukissiuteqarnermut iluaqutaassapput, Naalakkersuisut siulittaasuat Kim Kielsen oqarpoq.

Ikuallaavissat nutaat Sisimiuni Nuummilu inissisimanissaat naatsorsuutigineqarpoq. Ikuallaaviit ima angitigissapput avatangiisinut peqqinnissamullu iluaqutaasumik pujumik saliisinnaassallutik. Taamaaliornikkut nuna tamakkerlugu eqqagassat illersorneqarsinnaasumik isumagineqarsinnaalissapput. Aamma isumaqatigiissutigineqarpoq mingutsitsinngitsumik nukissiornermut eqqagassat atorneqassasut.

 

Kommunit aallarniutigalugu eqqagassalerinermik ingerlatsisussamik ataatsimoorussaminnik ingerlatseqatigiiffiliussapput. Taamaalillutik kommunit akunnerminni isumaqatigiissutigaat eqqagassalerinermut tunngasut suleqatigiissutiginiarlugit. Ingerlatseqatigiiffiup isumagisassaanut ilaassapput eqqakkanik ikuallaaviit marluk aamma uulikakunik ikuallaaviit pingasut nuna tamakkerlugu sullissisussat pilersinneqarnissaasa pilersaarusiorneqarnissat. Uuliakunik ikuallaaviit Qaqortumi, Maniitsumi Aasiannilu sananeqarnissaat naatsorsuutigineqarpoq. Ikuallaaviit sananeqarnissaat ingerlanneqarnissaallu ingerlatseqatigiiffimmit kommunit ataatsimut pilersitassaannit isumagineqassaaq. Ingerlatseqatigiiffiup taassuma aamma eqqagassat assartorneqarnerini ikuallaavissanilu nutaani ikuallanneqarnissaannut aningaasartuutinut matussutissat suleqatigiissutigineqarnissaat isumagisassaraa.  

Naalakkersuisut suliniummut tapersiillutik 6 mio. kroninik aningaasaliissapput.

 

Eqqagassalerineq kommunenit ullumi akisussaaffigineqarpoq – katersornerannit ikuallannerannut.

Kommunit Naalakkersuisuniit tapiiffigineqartumik ukiorpaalunngortuni nunaqarfinniit illoqarfinniillu mikinerniit illoqarfinnut anginerusuni ikuallaaveqarfiusunut eqqagassanik assartuisarneq misileraaffigisimavaat. Angusat pitsaasuusimapput, taamaattumik borgmesterit aamma Naalakkersuisut tamarmiullutik akunnerminni isumaqatigiissutigaat eqqagassalerinermi nuna tamakkerlugu aaqqiissuteqarnissamut piffissanngortoq.  

 

Ikuallaavinnik nuna tamakkerlugu sullissisussanik pilersitsinissaq politikikkut ataqatigiissaarisut septemberip 25-ani 2018-imi Nuummi ataatsimeeqatigiinneranni aalajangiunneqarpoq. Politikikkut ataqatigiissaarisoqatigiit tassaapput Naalakkersuisut borgmesterillu.

 

Paasisaqarnerorusuttut attavissaat: Naalakkersuisoqarfimmi pisortaq Mette Skarregaard Pedersen oq.: 346476 og e-mail: pan@nanoq.gl