Nuummi nutaamik tikeraat ornitagaannik pilersaarutit

Naalakkersuisoq Aqqalu Jerimiassen Kommuneqarfik Sermersoorlu annertuumik takornariaqarneq pillugu isumasioqatigiissitsipput

Naalakkersuisoq Aqqalu Jerimiassen Kommuneqarfik Sermersoorlu annertuumik takornariaqarneq pillugu isumasioqatigiissitsipput
Nuummi nutaamik tikeraat ornitagaannik pilersaarutit

Inuussutissarsiornermut Nukissiuuteqarnermullu Naalakkersuisoq aamma borgmester Asii Narup takornariartitsinermik suliaqartut arlalippassuit peqatigalugit Sermersooq Kitaanut takornariartitsineq pillugu isumasioqatigiinneq ullumi naammassivaat. Isumasioqatigiinnerit arlallit qaammatip kingulliup iluani nunatsinni sumiiffinni assigiinngitsuni pisimasut nangillugit isumasioqatigiinneq ingerlanneqarpoq.

Ilaatigut nunamut namminermut takornariartitsinermut periusissiami nutaami pilersitat sorliit ilanngunneqarsinnaanerannut oqallisissiaq Naalakkersuisup Aqqalu Jerimiassenip saqqummiuppai. Nunami sumiiffiit allat assigalugit Kommuneqarfik Sermersuup nunap ilaanut takornariartitsinermut periusissiamik, nunatsinni periusissiamut siunnersuutissatut ilusilersuinissaanik Aqqalu qaaqqusissuteqarpoq.

Aammattaaq Nuummi tikeraat ornittagaliornissamut isumassarsiat siuarsarneqareersut Aqqalu Jerimiassenip saqqummiuppai. Tassunga atatillugu suliffissuaqarfiit umiarsualivitoqaanni Royal Arctic Line A/S-ip siusinnerusukkut qullersaqarfigisimasaanik tigusinissaq pillugu, tassanngalu nunatta illoqarfiani pingaarnersami tikeraat ornittagaannut nutaamut timitalittut toqqammavigisatut atugarinissaanik taakkuninnga oqaloqateqarnini Naalakkersuisup ilisimatitsissutigisinnaavaa.

Isumasioqatigiinnermi workshoppinik arlalinnik ingerlassaqartoqarpoq. Ullo’qeqqata siornatigut nunap ilaanut aamma nunamut namminermut takornariartitsinermut periusissianut siunnersuutinik suleqatigiit ilaanni suliaqartoqarpoq. Suleqatigiit allat illoqarfimmik pilersaarusiornerup sapinngisamik pitsaanerpaamik takornariaqarnerup allanngoriartorneranik tapersersuilersillugu qanoq aaqqissuunneqarsinnaaneranut siunnersuutinik pissanganartunik piviusunillu saqqummiussaqarput. Illoqarfimmi sumiiffiit assigiinngitsut takornarianut kajungernarnerutilerlugit ornigassaqqinnerulersillugillu qanoq ineriartortinneqarsinnaanerat sammisani qitiusut ilagisimavaat. Workshoppini sulinermissaaq illoqarfimmi tikeraat ornittagaata takkuttussap qanoq ineriartortillugulu ilusilersorneqarsinnaanera, minnerunngitsumillu umiarsualiveqarfiup tamarmiusup qanoq ineriartortinneqarsinnaanera misissorneqarput, taamaalilluta takornariartitsinermik immikkoortoqarfimmik suli annertunerusumik pissarsisinnaassagatta.

Ualikkut workshoppini aamma ataatsimoorluni nunap ilaani takornariartitsinermik periusissialiorneq qanoq piviusutigut suliarisinnaaneranut, aammalu ineriartortitsinermi naleqassutsit sorliit qitiutissanerinut arlalinnik oqaluuserinnittoqarpoq. Sammisassarpassuit akornanni piujuartitsisumik ineriartortitsinissamik pisariaqartitsineq immikkut erseqqissarneqarsinnaavoq – inuiaqatigiinnut tunngatillugu, soorlulusooq avatangiisinut tunngatillugu. Suliaqarnermissaaq ilaapput takusassaqqissuutit sorliit takornarianut neqeroorutigisinnaasagut misissorlugillu oqaluuserineqarput.

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq: ”Nuummi ullumikkut isumasioqatigiinneq assut nuannaarutigaara. Kalaallit Nunaanni takornariartitsinermik qanoq ililluta ineriartortitsinissatsinnut siunnersuutit assut piviusorpalaartut amerlasoorpassuit tusarnaagarineri assut iluarisimaarnarput. Maanna kommunit tamaasa, Tunu ilanngullugu angalaffigereerpakka – pissarsiarpassuillu maannakkut nunap ilaani aamma nunami namminermi takornariartitsinermik periusissianut nutaanut ataqatigiissunut 2019-ip qeqqani piareersimassasunut atuutsinneqalissapput.”

Annertunerusumik paasissutissarsioruit attavigiuk Naalakkersuisoqarfiup pisortaa Jørn Skov Nielsen, Inuussutissarsiornermut Nukissiuuteqarnermullu Naalakkersuisoqarfik, oq. +299 55 61 88, e-mail: jsn@nanoq.gl