Kapisillip nalunaaqutaanik nassiussisoq akissarsivoq

1960-ikkunnili kapisilinniartartup kapisilinnut nalunaaqutsiunneqartoq pinnassutigivaa


1960-ikkunnili kapisilinniartartup kapisilinnut nalunaaqutsiunneqartoq pinnassutigivaa
Inuussutissarsiutigalugu aalisartoq Maniitsumeersoq Qulutannguaq Møller kapisillit nalunaaqutaannik nassiussimasutut septembarip 16-anni ukioq manna akissarsitinneqarpoq.
NASCO-p akissarsissutigisartagaanik West Greenland Tag Returnimik 1.000 pund sterlinginik akissarsisinneqarluni, 8.042 koruunit.

Inuussutissarsiutigalugu aalisartup kapisillip meqqia Pinngortitaleriffimmut nassiussimavaa.
Qulutannguup kapisilik Maniitsup kujataani Ikerasaap Alannguani septembarimi 2017-imi pisarisaa Irlandip kuisa ilaanni Delphi on the Bundorragha Riverimi apriilip 29-anni 2016-imi meqqilerneqarsimavoq.
Qulutannguaq Møller meeraallunili ilaquttani kapisilinniartut peqatigalugit angalaqataasarpoq.

- Ukiut tamangajaasa kapisilinniartarpunga. Kapisilinnik aamma tarajorterisarpunga. Ilanngullugu oqaluttuarisinnaavara ataatagigaluara Sisimiut eqqaanni kapisilinnik qanga misileraalluni aalisarnermut peqataasimammat.

- Qanigisama amerlanersai aamma aalisarnermik inuussutissarsiuteqarput. Nuannaralugulu aamma oqaluttuarisinnaavara nuliama angunni ilagalugu siusinnerusukkut kapisilinniaqatigisarsimammagu, Qulutannguaq Møller oqaluttuarpoq.

Aalisarnermut, Piniarnermut aamma Nunalerinermut Naalakkersuisoqar-fimmi atorfillip John Biilmannip NASCO, North Atlantic Salmon Conservation Organization sinnerlugu akissarsissutigineqartoq tunniuppaa.
Aalisarnermut, Piniarnermut Nunalerinermullu Naalakkersuisup, Erik Jensen, aamma NASCO-p præsidentiata, Johannes Vitales, Qulutannguaq pilluaqquaat.

Kapisilinnut nalunaaqutsiunneqartartut pisoqalineq ajorput, qangalili pisaasimasut nalunaaqutaat nassiunneqarsinnaasarlutik. Soorlu Qulutannguup pisaata tamanna uppernarsisikkaa, pisaa 2016-imi nalunaaqutserneqarsimagami.

NASCO
NASCO tassaavoq nunat naalakkersuisuisa suleqatigiiffiat, kapisilinnik Altantikup avannarpasissuaniittunik peqartuaannarnissaanik suliniaqatigiiffiat, kapisileqatigiit qularnaatsumik aqutsinikkut piujuaannaqqullugit suliniaqatigiiffiusoq.
NASCO-p Atlantikup avannarpasissuani kapisileqartuarnissaanik suliaqarnerminut ilanngussimavaa kapisillit nalunaaqutsersortarlugit. Suliniaqatigiiffiullu tamaani najugallit kajumissaarpai kapisilinnik nalunaaqutalinnik siumugaqarsimagunik, taakku nassiuttassagaat sumi qangalu pisaasimaneri ilanngullugit ilisimatitsissutigineqartassa-sut. Taamaalilluni kapisillit nuuttarneri tamatumuunakkut ilisimasaqarfiginerulissammata.

Nunatsinni kinaluunniit nalunaaqutalimmik kapisilittoq, pisarisami nalunaaqutaa Pinngortitaleriffimmut nassiussinnaavaa. Pinngortitaleriffiup nalunaaqutaq NASCO-mut nassiuttarpaa, suliniaqatigiiffillu ukiut tamaasa ataatsimiinnermini nalunaaquttanik nassiunneqarsimasunik makitsisarpoq, makinneqartoq 1.000 pund sterlinginik aningaasartalinnik akissarsisinneqartarluni.

Attavigineqarsinnaavoq John Biilmann, AC-fuldmægtig, Aalisarnermut Piniarnermullu Naalakkersuisoqarfik. Email: johb@nanoq.gl