Nunat Avannarliit Killermiut malussarissutsit pillugit inunnut nuannatsitsinerat

Sapaat ulloq 23. september Nuummi Nunat Avannarliit Killiit ulloqartinneqassapput. Ukioq manna pilersaarut kikkunnut tamanut ammavoq imarissavaalu Nunat Avannarliit Killiit takunerat, tusaanerat, nerisassaataasa ussernerat misiginerallu

Katuaq, Kalaallit Nunaanni Nunat Avannarliit Piorsarsimassutsikkut Allaffiat (NAPA) aamma Ilinniartitaanermut, Kultureqarnermut Ilageeqarnermullu Naalakkersuisoqarfik suleqatigiillutik 2018-imi Nunat Avannarliit Killiit ulloqartinneqarnissaat pilersaarusiorsimavaat, ilaqutariillu tamarmiusut sammisanut, pisunut, nipilersortunut filminullu – Nunanik Avannarlernik Killernik qitiutitsisunut pissanganartunut qaaqquneqarput.

”Naalakkersuisut Nunani Avannarlerni Killerni suleqatigiinneq pingaartittorujussuuaat. Tamanna ilaatigut kulturikkut, ilinniartitaanikkut ilisimatusarnikkullu Nunat Avannarliit Killiit akornanni suleqatigiinnissamik isumaqatigiissuteqarnikkut 1986-imili piusimasukkut kingullermillu siorna nutarterneqartukkut takuneqarsinnaavoq,”  Ilinniartitaanermut, Kultureqarnermut, Ilageeqarnermut Nunanullu Allanut Tunngasunut Naalakkersuisoq Vivian Motzfeldt oqarpoq.

Katuaq, Illorput, Nunatta Atuagaateqarfia aamma Nuuk Kunstmuseum tamarmik sammisaqarfiussapput, taamaattumik Nunani Avannarlerni Killerni ataatsimoorneq pulaffigissallugu periarfissaqassaaq. Soorlu assersuutigalu Illorpumi illu ammassaaq tassanilu qanoq qiviunik qissisoqartarnersoq isiginnaarneqarsinnaassaaq. Imaluunniit eqqumiitsuliortut ”The Weather Diaries”-imik nunarsuarmi eqqumiitsulianik Nunani Avannarlerni Killermeersunik saqqummersitsisimasut Katuami Nuuk Kunstmuseumimilu oqallitsitsilerpata tusarnaariarit. Immaqa Cafétuap ullaakkorsiortitsinerani Nunani Avannarlerni Killerni nerisassat usserusunneruatit? Nunani Avannarlerni Killerni nipilersuutinik tusarnaarlutit, ilutsinik Nunanit Avannarlernit Killerneersunik qalipaarusunneruvutit imaluunniit allaqqissaamik sammisaqarusupputit? Ilaqutariinnut tamanut sammisassaqarpoq! Pilersaarut tamaat uani takuuk: www.facebook.dk/naku2018 imaluunniit www.katuaq.gl.

Nunat Avannarliit Killiit Ulluata tunngavia:

”Savalimmiut, Kalaallit Nunaata Islandillu akornanni kulturikkut suleqatigiinnissamut isumaqatigiissut” 1. november 2017-imeersoq naapertorlugu nunani tamani ”Nunat Avannarliit Killiit Ulluat ukiut tamaasa ingerlanneqartalissaaq. ”Nunat Avannarliit Killiit Ulluat” tassaavoq ukialeqqaarfik Nunani Avannarlerni Killerni oqaluttuarisaanerup kulturillu malunnartinneqarnissaat pillugit toqqarneqarsimavoq, tassunga ilanngullugu nunat akornanni suleqatigiinnerup annertusarnissaa ataatsimooqatigiittutullu misiginissaq.

”Nunat Avannarliit Killiit Ulluat” Nunani Avannarlerni Killerni Siunnersuisoqatigiit kaammattuutaannit nr. 4/2008-meersumit kingornatigullu aaqqissuunneqarsimasumit aallaaveqarpoq.

Nunat Avannarliit Killiit Ulluat pillugu Facebookimi atuarnerugit www.facebook.com/naku2018/ aamma Katuap internetikkut nittartagaa www.katuaq.gl

Nunat Avannarliit Killiit Ulluat 208 Nunat Avannarliit Killiit Aningaasaateqarfiannit, Tipsernermit Lottornermillu aningaasaliissutinit kiisalu Namminersorlutik Oqartussat Kulturikkut Aningaasaliissutaannit aningaasalerneqarpoq.  

Paasissutissanik sukumiinerusunik pissarsiniarlutit una saaffigiuk:

Suliniummik aqutsisoq Anne Nivika Grødem, tlf: 560282, E-mail: kontakt@nivika.gl