Kalaallit Nunaanni innuttaasut suliffeqarfiillu atugaat oqinnerussapput

Digitaliseeriinermut periusissiaq 2018-2021 nutaaq Naalakkersuisunit saqqummiunneqaqqammerpoq. Digitaliseeriinermut periusissiaq 2018-2021 – Inuiaqatigiit Digitaliusut atorlugu digitalinngorsaanerup iluani inuiaqatigiit siumut aallarnissaat Naalakkersuisunit kissaatigineqarpoq. Inuiaqatigiinni tamani digitalinngorsaaneq annertusarneqassaaq. Periusissiaq atorlugu nuaaliornissamut periarfissat nutaat ammaanneqassapput, inerisaasoqarnerulissaaq taavalu digitalinngorsaanikkut innuttaasut suliffeqarfiillu siunissami toqqammavissaat qulakkeerneqassaaq.

”Periusissiap iluatsittumik atulersinnissaanut ataqatigiissaarineq, suleqatigiinneq, ammasuuneq aamma immikkoortut, tassa namminersortut pisortallu akornanni paasissutissanik paarlaasseqatigiinneq pingaarnertut inissisimapput. Digitaliseeriinermut periusissiaq 2018-2021-mi suliniutit atulersinneqarnissaannut qilanaarpunga. Periusissiaq piviusunngortinneqalereerpat, nunami nutaamik periarfissaqarluni innuttaasuuneq suliffeqarfiuteqarnerlu oqinnerulissaaq, tassanilu piffissaq sumiiffillu aamma sumiiffiit ungasissusaat apeqqutaajunnaarlutik tamat oqartussaaqataanerat nukittorsarneqaatigaluni kiffartuussineq ingerlanneqarsinnaalissaaq. Tamatuma peqatigisaanik nunani tamalaani niueqatigiinnikkut isumannaatsumik ingerlatsisinnaaneq nukittorsarneqassaaq.”, taama oqarpoq Vivian Motzfeldt, Ilinniartitaanermut, Kultureqarnermut, Ilageeqarnermut Nunanullu Allanut Naalakkersuisoq.

Periusissiaq suliniuteqarfilinnik arfinilinnik sammisaqarpoq. Sammisat innuttaasunut suliffeqarfiutilinnullu tunngatillugu susassaqarfeqarpoq siammasissunik qitiusunillu.

1. Innuttaasoq digitaliusoq
Misissuineq naapertorlugu Kalaallit Nunaanni oqarasuaatinik angallattakkanik smartphonenik taaneqartartunik tabletsinillu atuisartut amerliartuinnartut. Innuttaasut katillugit 83 %-ii internettimut atassuteqarput. Tamanna innuttaasunut suliffeqarfinnullu toqqissisimanartumik assigiissakkamillu misigisaqarnissaannut digitalimik aaqqiissutit pisortat assigiissaanissaanut atoruminarsaanissaanullu toqqammaviulluarpoq.
Vivian Motzfeldt ima oqaaseqarpoq:
”Digitalinngorsaanikkut tamat oqartussaaqataanerat annertusarneqarpoq inuiqatigiillu pisortanut naalakkersuinermillu aalajangikkanut takunnissinnaanerannut sakkutsialaalluni kiisalu tamat oqartussaaqataaneranni paasisanik peqataanissamillu naligiimmik pineqarnissamut periarfissiilluni”.

2. Sillimaniarneq aamma inuttut namminerisamik inuuneq
Digitalinngorsaaneq killeqanngilaq, taamaattumik aamma cyberimik navianartorsiortitaaneq pisinnaavoq. Sillimaniarnermut tunngatillugu arlalitsigut suliniuteqartoqartussaavoq, tamannalu ilaatigut Namminersorlutik Oqartussat paasissutissiinermut isumannaallisaanerata inatsisillu nutaap kingunerisaanik nutarsaasoqartussaalluni.
Vivian Motzfeldt tamatumunnga atatillugu ima oqaaseqarpoq:
”Kalaallit Nunaata tutsuiginartuunissaa, isumannaatsuunissaa suleqataalluarnissaalu pingaaruteqarluinnarpoq, taamaattumik nunatut isumannaatsutut inissisimalernissaa anguniassavarput. Taamatut inissisimalernikkut nunani tamalaani inunnut paasissutissanut tunngatillugu niueqatigiinneq paarlaasseqatigiinnerlu annerulissaaq – assersuutigalugu peqqinnermut tunngatillugu”.

3. Digitaliusumik pissusissamisoortumik ileqqoqarneq
Innuttaasut qanorluunniit ukioqaraluarunik illoqarfinni nunaqarfinnilu atuartitsinikkut pitsaasumik periarfissaqartinneqarnissaat anguneqassaaq. Kingunerisaanillu alimasissumit atuartitsineq, elektronikkikkut attaveqaatit atorlugit atuartsitsineq digitalimillu attaveqaateqarneq matumani tunngaviusumik sakkussaammata annertusarneqassapput.
Kultureqarnermut tunngasut kalaallit kulturiisa kingornutarinissaanut attassiinnarnissaq siammarterinissarlu anguniarlugit sapinngisamik digitalinngorsarneqassapput.
Vivian Motzfeldt ima oqaaseqarpoq:
”Meeqqatta digitaliusumik pissusissamisoortumik ileqqoqalernissaannut toqqammavilernissaanut tamatta akisussaaffigaarput, taassumalu inerisaqqinnissaa meeqqat atuarfiinit akisussaaffigalugu nanginneqassaaq, aammalu tamatta cyberimik atuinitsinni isumannaatsumik atuinissatsinnut akisussaaffeqarpugut. Taamatut ilisimasaqalernissamut elektronikkikkut attaveqaat atorlugu ilinnialernissaanut periarfissaavoq. Taamaattoqarnermi attaveqarnissat periarfissallu assigiissapput, taamaammat inuiaqatigiit qaninnerulerlutillu ataqatigiinnerulissallutik. ”

4. Digitalimik ineriartortitsineq, aallarnisaaneq aamma inuussutissarsiutit
Innuttaasut Sullissivik.gl-imut ataatsimik isaaveqarnerattulli inuussutissarsiuteqarlutik namminersortut pisortanut ataatsimik isaaveqarnissaat Naalakkersuisunit qulakkeerneqarumavoq. Inatsisitigut tunngavigisat, akileraartarnerit pissutsillu allanut tunngasut paasisaqarfiginiaraanni inuussutissarsiuteqartunut ajornaannerusariaqarpoq.
Vivian Motzfeldt ima oqaaseqarpoq:
”Allanngortiterinissamut piareersimanerput atorluassavarput. Digitalimik ineriartortitsineq aallarnisaanerlu nunami nukissiuuteqarnikkut suliaqartut peqatigalugit inuussutissarsiutinik, suliffeqarfinnik avataaniillu aningaasaliiniartunik nutaanik soorlu paasissutissanik ingerlatsivittut ittunik pilerisaarisoqassaaq. Inerisaanissamut periarfissat nutaat atorlugit inuiaqatigiit imminnut napatinniartut ikorfartorsinnaavaat.”

5. Pisortani ataatsimoorussamik digitaliusumik aaqqissuussinerup sanarfineqarnera
Pisortani ataatsimoorussamik digitaliusumik aaqqissuussinerup sanarfineqarnerani attaveqaatip ataatsimoorussamik isumannaatsumillu paarlaasseqatigiiffiliorfiginissaa pingaaruteqarluinnartussaavoq, tassanilu pisiortorfiusut atuisullu pisinnaatitaaffeqartut inuiaqatigiinnut digitalimik paasissutissaat isumannaatsumik ataavartumillu paarlaasseqatigiiffigineqarsinnaallutik. Inuiaqatigiinnut tamanut inerisaataasumik paasissutissaqarnissaq tamatumuuna qularnaarneqassaaq.
Vivian Motzfeldt ima oqaaseqarpoq:
”Paasissutissat digitalinngorsarneri pitsaanerusumillu atoqqitassanngortinneri digitalimik aaqqiissuteqartumik pisortat ataqatigiinnerusumik naammassiuminarsakkamillu kiffartuussinissaat pilersinneqassaaq. Innuttaasut suliffeqarfiillu namminersortut pisortanut ajornaannerusumik iserfissaqalernissaannut qilanaarpunga, taakkumi oqartussaqarfiit akimorlugit pisortani ataqatigiissakkamik kiffartuunneqarneq misigisussaavaat.”

6. Peqqinnissaqarfik digitaliseerigaanerusoq
Napparsimasunik nalunaarsuiffiup (EPJ) atulersinneqarnera peqqinnissaqarfiup digitaliseerigaaneranut alloriarnerusimavoq angisooq. Maanna EPJ-imi periarfissat aallutarineqassapput, aamma suli atorneqanngitsut ilanngullugit.
Vivian Motzfeldt ima oqaaseqarpoq:
”Innuttaasut kikkulluunniit nuna tamakkerlugu peqqinnissaqarfimmi assigiimmik pineqarnissaq misigissavaat. Digitalinngorsaanermi suliniutit atorlugit aningaasartuutit ikilisarneqassapput, aningaasatigut atugassat pitsaanerusumik atorneqassapput aamma peqqinnissami suliniutit innuttaasunut tamanut iluaqutaasussanngorlugit annertusarneqarnissaanut iluaqutaassapput”.


Periusissiaq tamarmi uani atuarneqarsinnaavoq www.digitalimik.gl.

Attavissaq: Aqutsisoqarfimmi pisortaq John Siegstad Oq./Tel.: +299 34 69 98  E-Mail: jofs@nanoq.gl