Takornariartitsinerik ineriartortitsineq immikkut sammineqarpoq

Naalakkersuisup Aqqalu Jerimiassen-ip aamma Qeqqata kommuniata inuussutissarsiorneq aamma takornariartitsinerik ineriartortitsineq immikkut samminiarpaat


Naalakkersuisup Aqqalu Jerimiassen-ip aamma Qeqqata kommuniata inuussutissarsiorneq aamma takornariartitsinerik ineriartortitsineq immikkut samminiarpaat
Inuussutissarsiortut aamma pisortat sapaatip akunnerata naanera atorpaat Maniitsumi nunamut tamarmut takornariartitsinikkut periusissiap perrassarlugu aallarnisarneranut, aammalu kommunip inuussutissarsiornikkut ineriartortitsinerani killiliussat allatigut nukittorsaavigalugit.

Inuussutissarsiornermut Nukissiuuteqarnermullu Naalakkersuisup Aqqalu Jerimiassen-ip arfininngormat ilisaritippai suliniutissat aalajangersimasut arlaqartut inuussutissarsiornermut periusissiami ilaasut, tamatumani aamma sermimik aamma imermik avammut nunatsinniit niueruteqarnermut periusissiamut tunngasut, soqutiginnilersitsiniarnissaq suliffissuaqarfinnut nukissiuummik annertoorsuarmik atuisartunut, erngup nukinganik nukissiorfiliorsinnaanermik periarfissat pigeriikkagut iluaqutigalugit ingerlanneqarsinnaasunut, kiisalu periusissiaq nutaaq uuliasiornerup gas-imillu ujarlernerup Qeqertarsuup eqqaani Nuussuup qeqertaasartaani aallarteqqinniarlugu.

Qeqqata Kommuniani inuussutissarsiortunit pikkorissunit saqqummiunneqartut soqutiginartut arlaqartut ilaat immikkut malugeqquneqartoq tassaavoq Maniitsoq Tour Boat APS, Nuup aamma Maniitsup akornanni imaatigut aalajangersimasumik akuttussusilersukkamik angallassisuusoq aningaasarsiornikkut imminut akilersinnaasumik tunngavilimmik. Suliffeqarfik najugaqavissoq ukiut kingulliit 9-it iluanni imaatigut ilaasunik 13.000 -init amerlanerusunik angallassisarsimasoq, aalajangersimasumik sapaatip akuneranut arlaleriarluni sinersortartoq. Saqqummiussat allat ilagaat nunatsinni qeqqussanik nioqqutissiornermik aallartitsinissamut periarfissat. Inuussutissarsiutinut pisortaniit aningaasaliinissamut periarfissat ilisaritinneqarput Greenland Business A/S-imiit oqallisigineqarlutillu.

Sapaammi 16. september immikkut sammineqarput takornariartitsinermik inuussutissarsiummik ineriartortitsinissamut periarfissat, Aqqalu Jerimiassen-ip kommune najukkamilu ingerlatsisut qaaqquai ilassutissaminnik saqqummiussinissaannut nunamut tamarmut atuuttumik inuussutissarsiornermut periusissiamut 2019-ip qiteqqunnerani pisareersimasussamut atatillugu.

Visit Greenland, Arctic Circle Business aamma takornariartitsinermik ingerlatsisut namminersortut isummaminnik ilassutissaminnillu saqqummiussuipput, nunap immikkoortuani tamaani qanoq takornariartitsinikkut inuussutissarsiummik ingerlatsisoqarsinnaanera pillugu.

Workshop-it arlaqartut namminneq isummersuutiminnik saqqummiussuipput inuussutissarsiornikkut takornariartitsinikkullu ineriartortitsinissamut aggersumut nalerassatut siunnerfiusussatut isumaqarfigisatik pillugit, saqqummiunneqartullu amerlasuut akornanniit eqqaaneqarsinnaapput:

• Nukissiuuteqarnermut suliassaqarfimmut atatillugu ingammik erngup nukinganik immikkut iluaquteqarnissamut periarfissat saqqummiussorneqarput, immikkuullarissumik periarfissaasutut suliffissuaqarfissuarnik annertoorsuarmik nukimmik pisariaqartitsisunut periarfissatsialattut.

• Arlallit tungaaniit tikkuartorneqarpoq pisariaqartitsineq aallarnisaasut ineriartortitsisarnerannik tapersersuinerup suli annerusumik tapersersorneqarnissaa eqqarsaatigalugu. Tamatumunngalu tapiliullu suliassaqarfiit assigiinngitsut akornanni killiliussat akimorlugit inuussutissarsiornikkut ineriartortitseqqinnissamut periarfissat tikkuartorneqarput tapersersorneqarnerat annertusarneqarsinnaasoq.

• Najukkami namminermi takornariartitsisartut aningaasarsiornikkut isertitassaasa annertunerulersinneqarnissaat angusinnaajumallugu eqqaaneqarput ineriartortitsinissat najukkami neqeroorutinik misigisassanillu pissanganartunik, ataatsimoorussamik suliassatut pisortat aamma namminersortumik inuussutissarsiortut akoranni peqatigiinnikkut.

• Kommune takornariartartunut takujuminartunik peqarluarpoq, maannalu aamma takornariartartunik amerlasuunik tikeraarteqartarluni. Tamatumunngalu atatillugu oqallisigineqarpoq pisariaqartitsisoqartoq nunarsuarmiut takornariartartut sulilu amerliartortut sullinnerannik isumaginnittut piginnaanerisigut suli annertusiartortitsisoqarnissaa pisariaqartinneqartoq.

• Inuussutissarsiornikkut takornariartitsinikkullu ineriartortitsinerup siuariartorfiusup isumannaatsumik ingerlalluaannarnissaa qularnaarumallugu, sammineqartut aamma ilagaat suli annertunerusumik suleqatigiittoqarnissaa pisariaqartinneqartoq najukkami, nunap immikkoortuini aamma nunami tamarmi takornariartitsinikkut inuussutissarsiornikkullu ingerlatsisuusut pisortallu ingerlatsiviisa akornanni.

Inuussutissarsiornermut Nukissiuuteqarnermullu Naalakkersuisoq Aqqalu Jerimiassen oqarpoq: ”Nuannaarutigaakka oqallinnerit pitsaasut amerlasuullu ingerlanneqartut aamma suliniutinut ilassutissatut saqqummiussukkat inuussutissarsiornikkut takornariartitsinikkullu ineriartortitsinermut atatillugu. Pingaaruteqarpoq ikaartarfilersuinissarput isummat assigiinngisitaartut amerlasuullu nunatsinni sumiiffinnit assigiinngitsuniit saqqummiussorneqartut akornanni, atugassarititaasunut killiliussat Qeqqata Kommuniani namminermi nunatsinnilu nunap immikkoortuini allani atuuttuusut eqqarsaatigalugit. Qilanaaraara 2019-ip qeqqata tungaanut nunamut tamarmut takornariartitsinikkut pilersaarummik pilersitsinissarput, sapinngisamik annertunerpaatigut nunamik tamarmik isiginiaasumik.”.

Annertunerusunik paasisaqarumagaanni attavigineqassaaq Pisortaaneq Jørn Skov Nielsen, Inuussutissarsiornermut Nukissiuuteqarnermullu Naalakkersuisoqarfik, oqarasuaat +299 55 61 88, e-mail: jsn@nanoq.gl