Nunarput issittup imartaa pillugu isumaqatigiissummut atsiortitsisuussaaq


Naalagaaffiit aalisartoqarfissuusut qulit, Issittumut sineriallit Canadap, USA, Rusland, Norge aamma Savalimmiunut Kalaallillu Nunaannut atatillugu kunngeqarfik Danmark, Island, EU, Korea Kujalleq, Japan aamma Kina peqatigalugit ukiuni arlalinni isumaqatigiinniareernermi, nunat tamalaat akornanni Issittup imartaata qiterpasissuani aqunneqanngitsumik aalisarnermik pinngitsoortitsiniarlutik isumaqatigiissuteqarput Issittup imartaata qiterpasissuani aqunne¬qanngitsumik aalisarnerup pitsaaliornissaa pillugu isumaqatigiissuteqarlutik.

Naalakkersuisut isumaqatigiissut septembarip 13-ianni 2018-imi akuersissutigaat.

Aalisarnermut, Piniarnermut Nunalerinermullu Naalakkersuisup Erik Jensenip naalagaaffiit atsioqataasut sinniisui persuarsiorpalaartumik nunatsinni atsioqa-taanissaannut qaaqquai. Nunani allani aalisarnermut ministerit, nunanut allanut ministerit aamma aallartitat atsioqataanermut peqataassapput.

Canada isumaqatigiissummik isumaginnittuuvoq USA-lu isumaqatiginninniarnerni aqutsisuulluni. Taamaalilluni isumaqatigiissut issittumi atsiorneqarsinnaalerpoq.

Isumaqatigiissut Issittup imartaata qiterpasissuani tamarmut siunissami eqqissisitsinerunngilaq, tunngaviusumilli isumassarsiaq tassaavoq naammattumik ilisimasaqalernissap aamma nungusaataanngitsumik atuinissamik malittarisassat pisariaqartinneqartut atuutilersinnagit aalisarneq ammaanneqassanngitsoq.

- Isumaqatigiissut asseqanngilaq oqaluttuarisaanermullu ilaalluinnarluni, ajornartorsiutip pilinnginnerani naalagaaffiit quliusut aaqqiiffigimmassuk. Issittumi siunissami aalisarsinnaaneq isumaqatigiissutikkut mattunneqarnavianngilaq, taa-maattoq nunarsuatsinni imartani innarlerneqanngitsuni kingulliit ilaanni aqunne-qanngitsumik ingasaassilluni aalisarneq pinngitsoortissavaa.

- Isumaqatigiissummut pingaaruteqarluinnartumut naammagisimaarinnilluinnarpunga, ukiuni arlaqalersuni unammillernartumik isumaqatiginniutaareerluni atsiorneqartussamut. Tulluussimaarutigeqaaralu nunatsinni persuarsiorpalaartumik isumaqatigiissut atsiorneqassammat,

Aalisarnermut, Piniarnermut Nunalerinermullu Naalakkersuisoq Erik Jensen oqarpoq.

Atsioqatigiinneq Ilulissani Hotel Arcticimi qaaqqusanut oktobarip aappaannit sisamaannut 2018-imi pissaaq.

Isumaqatigiissummi pingaarnerit tassaapput
- Nunap immikkoortuini aalisarnermut aqutsiveqarfimmik aaqqissuussamik, aalisarnermut aalisakkanik pisassiissutinik malittarisassanillu ilisimatu-sarnermik tunngaveqartumik aalajangersaasussamik pilersitsinissaq pillugu isumaqatigiittoqartinnagu, issittup imartaata qiterpasissuani aalisartoqassanngitsoq;
- Issittup imartaata qiterpasissuani pinngortitami ataqatigiinnerni aalisaga-qassutsimilu allanngornerit pillugit ilisimasanik tunisisinnaasussamik siunissaq ungasinnerusoq isigalugu ilisimatusarnikkut suleqatigiinnerup patajaallisarnissaa;
- Issittumi nunap inoqqaavisa soqutigisaat, aalajangiiniarnerni nunap inoqqaavisa najukkamilu inuit ilisimasaasa naleqassusiat aamma suliap ingerlaqqinnerani nunap inoqqaavisa najukkamilu inuit najugallit peqataanissaasa qulakkeerneqarnissaat akuersissutigissallugit;
- Piujuartitsinissamut aqutsinermullu aaqqiissuteqarnerit pillugit peqataasut aalajangersagaat naapertorlugit aalajangersakkat eqquutsinnerisigut misile¬raal¬luni aalisarneq taamaallaat ingerlanneqassaaq;
- Aalajangiiniarnerni peqataasut tamarmik isumaqataassapput;
- Isumaqatigiissut nunat tamarmik atortussanngortippassuk atuutilissaaq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaneq, Jørgen Isak Olsen. Email: jio@nanoq.gl