Amerikamiut aningaasaliissuteqarnissamik siunniussaqarput

Amerikamiut illersornissamut tunngatillugu aningaasaliissuteqarnissamik siunniussaqarlutik nalunaaruteqarnerat Kunngeqarfik Danmarkimit, Kalaallit Nunaat ilanngullugu ilassilluarneqarpoq

Kunngeqarfik Danmark, Kalaallit Nunaat ilanngullugu, aamma USA oqaluttuarisaaneq eqqarsaatigalugu ikinngutigiinneq suleqatigiinnerlu tunngavigalugit ingerlatseqatigiissimapput. Ukiut ingerlanerini kunngeqarfiup Danmarkip, Kalaallit Nunaat ilanngullugu, illuatungeriilluni illersornissamut soqutigisat illersorneqarnissaannut peqataasarsimapput tamatumalu malitsigisaanik aarleqqutigineqarsinnaasut akisussaaffiillu avitseqatigiillutik ingerlattarsimallugit. USA-p Kalaallit Nunaanni sakkutooqarfeqarnerata Kalaallit Nunaannut inuiaqatigiinnullu kalaallinut sapinngisamik annertunerpaamik iluaqutaalluni ingerlanneqarsinnaanissaata pineqartut akornanni paaseqatigiilluni ingerlanneqarnissaa kunngeqarfiup Danmarkip suliassaasa ilagisimavaat.

 

Ulloq17. septembari Amerikap illersornissamut ministeeriaqarfiata "Kalaallit Nunaanni illersornissamut tunngatillugu aningaasaliissuteqarnissamik siunniussaqarlutik nalunaarutaat" tamanut saqqummiunneqarpoq.  Nalunaarut siunissami suleqatigiissutaasinnaasunik soqutiginarluinnartunik periarfissiisoq, Kunngeqarfimmit Danmarkimit, Kalaallit Nunaat ilanngullugu, ilassilluarneqarpoq.

 

"Amerikamiut siunniussaminnik nalunaarutaat ilassilluarparput amerikamiullu mittarfinnut tunngassuteqartunik aningaasaleeqataasinnaanerinut periarfissat ataasiakkaat eqqartornissaanut qilanaalereerluta. Siunissami illuatungeriinnut iluaqusiisinnaasunik oqaloqatigiilluarnissaq Naalakkersuisut pingaartippaat. Tassunga tunngatillugu amerikamiut siunniussaminnik nalunaarutaat suliniutissatut ajunngilluinnartutut tiguarput Ilinniartitaanermut, Kulturimut, Ilageeqarnermut Nunanullu Allanut Naalakkersuisoq Vivian Motzfeldt taamak oqarpoq.

 

"Nunarsuaq tamakkerlugu politikki aallaavigalugu Issittoq pingaaruteqaleraluttuinnarpoq. USA-p Kalaallit Nunaanni sakkutooqarfeqarnermigut illersornissamut tunngatillugu suleqatigiinneq akunnitsinni illersoqatigiinnissatsinnut tapertaasoq ilutigalugulu issittup saqitsaaffiunngitsutut inissisimajuarnissaanut tapertaasoq pingaartittorujussuuarput nunanut allanut ministeri Anders Samuelsen taamak oqarpoq.

 

"Issittumi inuinnaat sakkutuullu siunissami amerliartornissaat eqqarsaatigalugu pineqartumi najuunnerup nakkutilliinerullu annertusineqarnissaa pisariaqassaaq. Danskit naalakkersuisuisa illersornissamut isumaqatigiissutaat 2023-p tungaanut atuuttussaq aqqutigalugu Issittumi najuunnerput annertusarsinnaassavarput.  Issittumi apeqqutinut tunngatillugu USA-mik qanimut suleqateqarnerput aamma issittumi sakkutuut suliatigut piginnaasaannik nalinginnaasumik nukittorsaanissaq pingaartittorujussuuavut illersornissamut ministeri Claus Hjort Frederiksen taamak oqarpoq.

 

Kunngeqarfik Danmark, tassunga ilanngullugu Kalaallit Nunaat, USA-mik qanimut suleqateqarnerup nanginneqarnissaanut qilanaarpoq aammalu siunissami ataatsimoorluni suliniutaasinnaasut illuatungeriinnut iluaqusiisussat Permanent Committeep piginnaatitsissutaasa iluanni misissornissaanut qilanaarlutik.