Misissueqqissaartoqareerpoq

Ineqarnermut Attaveqaqatigiinnermullu Naalakkersuisup Simon Simonsenip Inuit Ataqatigiit mittarfinnut ilusiliineq pillugu saqqummiussaanut isummernera

Inuit Ataqatigiit ippassaq siunissami mittarfinnut ilusiliinissaq pillugu saqqummiussivoq, imatut oqaaseqarfigerusutannik:

 

”Siullermik pingaarnertullu siunissami mittarfiit ilusiligaanerat qanoq isikkoqassanersoq isummaminnik saqqummiussimmata Inuit Ataqatigiit qutsavigerusuppakka. Immikkoortoq ulloq oktobarip 15-ani Ukiaanerani ataatsimiinnerup nalaani aappassaanneerneqartussanngorpat oqallinnerup ingerlaqqinnissaanut aallaavissaalluartoq qularnanngilaq”.

 

Saqqummiussinermut oqaaseqaatissakka:

 

”Nuummi 2.200 meterimik Imarpik qulaallugu timmisartunut mittarfiliortoqassasoq, aammalu nunatsinni angalaneq pisariinnerulersillugu nunatsinni attaveqaqatigiinneq tamarmi kivinneqassasoq, ilaatigut Inuit Ataqatigiit Naalakkersuisut isumaqatigimmagit nuannaarutigaara. Kisianni erseqqissassavara Naalakkersuisut Ilulissani aamma Nuummi 2.200 meterimik mittarfiliortoqarluni aammalu Qaqortumi 1.500 meterimik nunap immikkoortuani mittarfiliortoqarluni aaqqiissutissap ataatsimoortuunissaa Naalakkersuisut aalajangiusimammassuk aammalu suli sulissutigalugu.

 

Tamatuma saniatigut aamma erseqqissassavara aaqqiissutissamut ataatsimoortumut misissueqqissaarnerit suliarineqarmata, taakkunani takutinneqarluni inuiaqatigiinnut taamaalillunilu aamma innuttaasunut sipaarutissaqartoq – mittarfiit sananeqanngippata iluanaarutissat taakkua pissarsiarineqarsinnaassanngillat.

 

Taamatut oqareerlunga IA-p saqqummiussaa arlalitsigut Naalakkersuisut siunnersuutaannut assingusoq naammagisimaarlugu maluginiarpara, taamaattumillu Ukiaanerani ataatsimiinnerup nalaani Inatsisartut ataatsimiittarfianni inatsisissatut siunnersuutip suliarineqarnissaanut neriulluarpunga”.

 

Naalakkersuisut Siulittaasuat Kim Kielsen mittarfiliassat aammalu inuussutissarsiornikkut suleqatigiinneq pillugit Ministeriunermut Lars Løkke Rasmussen-imut isumaqatigiissuteqarpoq.

 

”Inuit Ataqatigiit imatut paasivakka, naalagaaffik tapersiisinnaasoq taamaalillunilu aamma mittarfiliassani peqataasinnaasoq, Naalakkersuisut danskit naalakkersuisuinut isumaqatigiissuteqarnerat partiip taperseraa. Tamannami isumaqatigiissummi nassuiarneqarluarpoq.

 

Naalakkersuisut danskit naalakkersuisuinut isumaqatigiissutaat piviusunngortinneqassappat, danskit naalakkersuisuinut annertunerusunik isumaqatigiissuteqartoqartussaasoq ilumoorpoq. Tamatumunnga ilaatigut isumaqatigiissutip aamma mittarfinnut sanaartornissamut inatsisip Inatsisartuni qanoq suliarineqarnissaa apeqqutaassaaq.

 

Mittarfiliassanut naalagaaffiup tapersiinissaa pillugu ataatsimoorussamik siunnerfeqarnissaq pillugu isumaqatigiissutip sukumiisortaasunik tamaginnik imaqannginnera pissusissamisoorpoq. Isumaqatigiissut pingaarnernut tunngassuteqarpoq, naalakkersuisuni isumaqatigiissutigineqartoq. Kisiannili aamma isumaqatigiissutaavoq, Inatsisartuni tamanna taperserneqassappat, mittarfiliassanut ataatsimoortunut nukittorsaataangaatsiartussaq”.

 

Kujataaneeqqammerpunga, tassani ilaatigut innuttaasut, inuussutissarsiortut aamma kommuni attaveqaqatigiinneq pillugu oqaloqatigisimallugit.

 

”Suliassat taama annertutigisut piviusunngortinneqartussanngorneranni, siunissami attaveqaqatigiinnermi suliassanik nutaanik taakkuninnga iluaquserneqartussat ingerlaavartumik oqaloqatiginissaat pingaaruteqarpoq. Taamaattumik suliassat annertuut taakkua nunatsinni ineriartortitsinermut iluaqutaasussat pillugit oqaloqatigiinnermi najukkameersunik akuutitsinissamik Inuit Ataqatigiit kissaateqarnerat tapersiinnarsinnaavara”.

Annertunerusumik paasisaqarusuttut attavigisinnaasaat tassaavoq naalakkersuisumut allatsi Steve Sandgreen, oqarasuaat 59 66 59 imaluunniit e-mailikkut stes@nanoq.gl