Kujataani takornariartitsinermik ineriartortitsineq ingerlaqqippoq


Septemberip ulluisa aqqarnganni takornariartitsineq pillugu isumasioqatigiinneq Kujataani ingerlanneqarmat takornariartitsinermik suliaqartut pingaarutillit qassiit takornariartitsinerup siunissaa sammivaat.

Isumasioqatigiinnermi Qaqortumi ingerlanneqartumi nuna tamakkerlugu takornariartitsinermi periusissiassamut nunap immikkoortuaniit ilanngussassat tunniunneqarput. Takornariartitsinermi periusissiamik ukiuni qassiini atuuttussamik, kiisalu nunap immikkoortuinit tamanit takornariartitsinermut pilersaarutinik imaqartumik suliaqartoqarnissaanik Inuussutissarsiornermut Nukissiornermullu Naalakkersuisup Aqqalu Jerimiassenip siunnersuutigisaa isumasioqatigiinnermi taperserneqarpoq. Taamaammat suliassat aalajangersimasut pilersaarusiorneqarneranni kujataamiunik peqataatitsinerup pingaassusia peqataasunit qassiinit erseqqissarneqarpoq.

Isumasioqatigiinnermi sammisat soqutiginaatillit arlaqaqisut akornanni taaneqarsinnaasut tassaapput takornariat saaffiginnittarfissaannik pilersitsineq aammalu Kommune Kujallermi takornariagassaqqissunik tikkuartuineq. Tamatumununnga atatillugu UNESCO-p silarsuarmioqatigiinnut kingornutassiaqarfii tikkuarneqarput kiisalu Inuit qallunaatsiaallu assigiinnginnerat naapinnerallu Kujataanut ilisarnaatitut tikkuarneqarlutik.

Kujataata immikkuullarissumik oqaluttuassartaqarnera aammalu qanganitsanik innarligaanngitsunik soorlu illukunik pinngortitallu alutornartuinik takusassaqarnera pilersaarummut piujuaannartitsinermik tunngaveqartumut ilaassapput, pilersaarutikkullu naliliutivut ilaatigut pisuffissanik, ungallunik allanillu sanaartornikkut illersorneqassallutik – tamatuma peqatigisaanik takornariagassaqqissut takutittarnerisigut aamma aningaasanik isaatitsisoqarsinnaasariaqarpoq.

Inuussutissarsiornermut Nukissiornermullu Naalakkersuisoq oqarpoq:
”Kujataamiut takornariartitsinermik misilittagaqarluareerput. Qilanaarpunga Kommune Kujalleq peqatigalugu nunap ilaani taama nuannertigisumik takornariartitsinermik ineriartortitseqataanissannut.” Aqqalu Jerimiassen nangilluni ilisimatitsivoq: ”2019-mut aningaasanut inatsisikkut ukiunut qassiinut atugassanik takornariagassaqqissuutivut illersorniarlugit ersarissarniarlugillu aningaasanik immikkoortitsisoqarpoq kiisalu nunatsinni kommunini tamani takornariat saaffiginnittarfiinik pilersitsinermut tapersiissutissanik aningaasanik immikkoortitsisoqarsimalluni.”

Borgmester Kiista P. Isaksen oqarpoq:
”Kujataani namminermi aammalu nuna tamakkerlugu takornariat suli amerlanerulersinneqarnissaannut suleqataanissamut piareersimavugut. Taamaammat isumasioqatigiinnermi matumani nuna tamakkerlugu takornariartitsineq pillugu periusissiassamut maannamut ilanngullarigassagassatsinnik tunniussisinnaanerput pingaaruteqarluinnarpoq.”

Takornariartitsinerup nukittorsarneqarnissaanut siunnersuutinik aalajangersimasunik qasseersuarnik peqataasut tikkuartuipput aporfiusinnaasunillu aamma tikkuaallutik.

Saqqummiussat pitsaasorpassuit atorlugit Kommune Kujalleq – kujataani takornariartitsinermik suliaqartunik peqateqarluni – takornariartitsinermut periusissiat nunap immikkoortuanut nunamullu tamarmut atuuttussat qanoq pitsaanerpaamik ataqatigiissaarneqarsinnaanerannik siunnersuuteqassaaq. Periusissiap nutaap 2019-ip qeqqani naammassineqarsimanissaa anguniagaavoq.

Paasissutissat sukumiinerusut pissarsiarineqarsinnaapput ukununnga saaffiginninnikkut:
Kommune Kujallermi paasissutissiinermut pisortaq Salome Hansen oqarasuaat 288847, e-mail sahn@kujalleq.gl
Naalakkersuisoqarfimmi pisortaq Jørn Skov Nielsen, Inuussutissarsiornermut Nukissiornermullu Naalakkersuisoqarfik, oqarasuaat. +299 55 61 88, e-mail: jsn@nanoq.gl