Statsministerip Naalakkersuisullu siulittaasuata ataatsimeeqatigiinnermik kingorna oqaaseqaataat

Danskit Kalaallit Nunaanni mittarfiit pillugit suliniummut tunniusimanissaat aamma Kalaallit Nunaat Danmarkilu inuussutissarsiornermi suleqatigiinnerunissaat pillugit statsministerip Naalakkersuisullu siulittaasuata ullumikkut isumaqatigiissuteqarfigaat.

Statsministerip Naalakkersuisullu siulittaasuata isumaqatigiissutigaat inuussutissarsiornerup ineriartornissaanut aamma nutaanik suliffissanik isertitsiffissanillu pilersitsinissamut Kalaallit Nunaanni attaveqatigiinnerup ajunngitsuunissaa pingaaruteqartoq.

Statsminister Lars Løkke Rasmussen oqaaseqarpoq:

”Nuannaarutigaara Naalakkersuisut siulittaasuat uangalu Kalaallit Nunaanni nutaanik mittarfiliornikkut attaveqatigiinnikkut nutarsaanissamut takorluukkamut iluaqutaasussamik ullumikkut isumaqatigiissuteqaratta. Peqatigisaanik suliniutissanik Kalaallit Nunaat Danmarkillu akornanni inuussutissarsiornermi suleqatigiinnissamut nukittorsaataasussanik isumaqatigiissuteqarpugut.

Folketingemi partiit tamarmik nukittuumik nammaqatigiissumillu naalagaaffeqatigiinnissarput aamma Kalaallit Nunaata ineriartornissaa soqutigisarilluinnarpaat.

Taamatuttaaq Kalaallit Nunaanni inuussutissarsiornernik attaveqatigiinnermillu pitsanngorsaanissamut. Partiit assigiinngitsut mittarfiit pillugit oqallisigeqatigereerlugit tamanna uppernarsivara. Folketingemi partiit sinneri isumaqatigiissut pillugu ilisimatinnissaannut qilanaalereerpunga.

Ullumikkut isumaqatigiissut iluaqutsiullugu nukissaqalissaagut. Ataatsimoorluta kivitseqatigiilluta. Naalagaaffeqatigiinnittalu pissaanera periarfissarpassuilu takutissavavut.”

Naalakkersuisut siulittaasuat Kim Kielsen oqaaseqarpoq:

”Soorlu statministerip nuannaarutigigaa, uangattaaq nuannaarutigaara Inatsisartut Kalaallit Nunaanni mittarfiit katitigaanerisa nutarsarnissaat pillugit aalajangernissaannut danskit naalagaaffiannit pingaarutilimmik annertuumillu ikiorsiiniarnissaannut isumaqatigiissuteqarsinnaasimagatta.

Isumaqatigiissut oqartussat pisinnaatinneqartut akuersinerisigut illuatungeriinnut tamanut isumaqatigiissutigineqarpoq. Tamanna Naalakkersuisunut ima isumaqarpoq, isumaqatigiissut Inatsisartunit akuerineqassasoq.

Naalakkersuisut soorunami neriuutigaat isumaqatigiissut akuerineqassasoq. Nuummi Ilulissanilu mittarfiit nutaat pillugit pilersaarutit akuerineqassappata, mittarfiit pillugit suliniummut isumaqatigiissut 1 mia. kr.-inik naleqassaaq.

Aammattaaq nuannaarutigaa inuussutissarsiornermi suleqatigiilluarfiusumi suleqatigiinnerunissamut aaqqiissutissarsimagatta. Taanna isumaqatigiissut maanna atuuttunngortinneqartoq atorlugu ataatsimoorluta Kalaallit Nunaanni aningaasaliinissamut, suliniutinik ineriartortitsinissamut kiisalu suliffissanik nutaanik pilersitsinissamut 220 mio. kr.-inik immikkoortitsissaagut. Qularinngilara inuussutissarsiornermi suliniutit pitsaasut naammassineqariarpata pitsaanerungaartunik periarfissaqartitsilissasut.

Naalakkersuisut neriuutigaat isumaqatigiissutip imarisai aalajangersimasut saniatigut, mittarfinnut inuussutissarsiornermullu atatillugu, isumaqatigiissut suleqatigiiffissatut nutaatut danskit naalakkersuisui Naalakkersuisullu akornanni nutaamik periarfissaqartitsillualissasoq.

Kalaallit Nunaanni aningaasaqarnikkut inuiaqatigiittullu nammineersinnaanngornissamut ineriartornissaq anguniagaraarput. Isumaqatigiissutit makku anguniakkap taassuma angunissaanut pingaaruteqarluinnarput.”

Isumaqatigiissummi pingaarnerit
Kalaallit Nunaanni mittarfiit pillugit suliniummut 2,8 mia. kr.-inik nammineq aningaasaatinit aningaasaliinissaq missingersuutinut ilanngunnerput, taakkunanilu naalagaaffik piginneqataasutut Nuummi Ilulissanilu mittarfiit nutaat sananissaannut 700 mio. kr.-inik aningaasaliissaaq. Taassuma saniatigut 450 mio. kr.-it Den Nordiske Investeringsbankimit taarsigassarsiariniarneqassapput, naalagaaffillu taakkununnga sillimmasiissaaq. Kiisalu naalagaaffik Nuummi Ilulissanilu mittarfiit nutaat sananissaannut 450 mio. kr.-it tikillugit taarsigassarsititsissaaq.

Kalaallit Nunaata Danmarkillu inuussutissarsiornermi suleqatigiinnerulernissaannut suliniutit Isumaqatigiissummi ilaapputtaaq. Namminersorlutik Oqartussat Greenland Venturemut Vækstfondenimullu katillugit 200 mio. kr.-inik Kalaallit Nunaanni aningaasaliinernut ataatsimoorussanut atugassanik aningaasaliissaaq. Taassuma saniatigut Greenland Venture Vækstfondenilu ilaatigut Kalaallit Nunaanni inuussutissarsiornikkut suliniutinut nutarsaanissat nukittunerulerniassammata inuussutissarsiornermut puljemik 20 mio. kr.-limmik pilersitsipput.

Naalagaaffiup peqataanera mittarfiit pillugit suliniummi aningaasalersuinissamut aningaasartuutissanut sipaagaqarfiungaatsiassaaq. Tamassuma suliniut qajannaannerulersissavaa peqatigisaanillu Namminersorlutik Oqartussat aningaasaqarnerat ernumanannginnerulissalluni.


Isumaqatigiissutip allassimanera una toorlugu saqqummersiguk. (PDF)

Annertunerusumik paasissutissat:
Statsministeriemi tusagassiornermi allattaaneq Sabrina Drevsfeldt Theil, oqarasuaat +45 33 92 22 62.
Naalakkersuisut Siulittaasuata Naalakkersuisoqarfiani tusagassiivimmi pisortaq Frederik Lund, oqarasuaat +299 55 94 24