Inuummarissaasut naapeqqissapput

- Suleqativit akornanni suliniutit peqqinnartut sorliit nuannarineqarneruppat? Qularnanngilaq Inuummarissaasut 47-t inuummarissaasutut pikkorissarnerup aappaani naapippata suliffeqarfimmi peqqissuseq siuarsarniarlugu oqaluttuanik misilittakkanillu nuannersunik eqqartorumaaraat.

Inuummarissaasutut ilinniarneq najukkami suliniuteqarneruvoq ukiut pingasut ingerlaneranni piareersaatitut sammineqartoq: Suliffeqarfiit Peqqissut suliffeqarfinni peqqinnermik ilorrisimaarnermillu tapersiinissamik siunertaqarpoq. CSR Greenland, Kalaallit Nunaanni Timersoqatigiiffiit Kattuffiat aamma Peqqissutsimut Ilisimatusarnermullu Naalakkersuisoqarfik suliniummut tunuliaqutaapput ullumikkullu suliffeqarfinnit 22-nit peqataaffigineqarluni.

Sulisut peqqissut nuannaartullu amerlanertigut sulisutut annertuumik nalerisimaarnerusarlutillu napparsimannginnerusarput, taamaattumillu pissutissaqarluarpoq suliffeqarfimmi sulisut peqqissusaat ilorrisimaarnerallu ukkatarineqarnissaannut.

Suliffeqarfinni annertuumik peqqinnerulerniarnissamik suliniuteqarneq suliffeqarfimmi pisarpoq, tassani Inuummarissaasut suleqatit ilorrisimaaleqqullugit ileqqut peqqinnartut ajunngitsullu pilersittarlugillu aalajangiusimaniartarpaat.

Inuummarissaasutut pikkorissarnermi ukkatarineqarpoq qanoq suliffeqarfimmi peqqinnartunik sammisaqarniarnermik aallartitsisoqarsinnaanersoq aalangiusimannittoqarsinnaanersorlu. Dansk Firmaidræt pikkorissartitsisuuvoq. Siunissaq ungasinnerusoq eqqarsaatigalugu pilersaarutaavoq inuummarissaasutut ilinniagaq nunatsinni atuutilerluassasoq.

Suliffeqarfiuniaraanni peqqinnartoq sammisat pitsaasut aalajangiusimaniarnissaat ukkatarineqartuarnissaallu pisariaqarpoq. Taamaattumik suliniummi qulequttat aqutsisunit tapersersorneqarneq, sammisamik aqutsineq, allannguutinik aqutsineq, tamatuma saniatigut peqqinnerlu ilorrisimaarnerlu annertusarlugit ilisimasanik piginnaanernillu ineriartortitsineq sammineqartarput.

Suliniut Suliffeqarfiit Peqqinnartut Statens Institut for Folkesundhed ikiorsiullugu ataavartumik nalilersoneqassaaq.

Inuummarissaasutut pikkorissarneq, immikkoortoq 2 Nuummi 13.-14. september aamma Maniitsumi 18.-19. september ingerlanneqassaaq. Pikkorissarnerup immikkoortua siulleq september 2017-imi ingerlanneqarpoq.


Paasisaqarnerorusukkuit ukua attavigikkit:
Peqqissutsimut Ilisimatusarnermullu Naalakkersuisoqarfik: Naalakkersuisumut allatsi Rosa Thorsen oqarasuaat: +299 553303
CSR Greenland: Allattoqarfimmi pisortaq Ulla Lynge oqarasuaat: +299 363714
Kalaallit Nunaanni Timersoqatigiiffiit Kattuffiat: Ineriartortitsinermut siunnersorti Aviaaja Geisler oqarasuaat: +299 348156