Naalakkersuisoqarfinni suliassaqarfinnut akisussaaffeqarfinni Naalakkersuisuni allanngortitsinerit

Selvstyrebygningen i Nuuk
Partii Naleraq naalakkersuisooqatigiinni Naalakkersuisunut tunuliaqutsiisuni suleqataajunnaarluni nalunaaruteqarnera tunngavigalugu, ullumi ulloq 10. september 2018 atuutilersumik Naalakkersuisut katitigaaneranni allanngortitsisoqarpoq.

Aningaasaqarnermut Naalakkersuisoq Pele Broberg aamma Isumaginninnermut Inatsisinillu Atuutsitsinermut Naalakkersuisoq Anthon Frederiksen Naalakkersuisuniigunnaarput.

Anthon Frederiksen-ip Naalakkersuisuniigunnaarnerata malitsigisaanik Isumaginninnermut Inatsisinillu Atuutsitsinermut politikkikkut akisussaaffik Peqqissutsimut Ilisimatusarnermullu Naalakkersuisup Doris Jakobsen Jensen-ip, Siumut, ataaniilerpoq.

Naalakkersuisup Pele Broberg-ip naalakkersuisuujunnaarnerata malitsigisaanik Aningaasaqarnermut politikkikkut akisussaaffik Aatsitassanut, Suliffeqarnermut, Nunamut Namminermut Nunanilu Avannarlerni suleqatigiinnermut Naalakkersuisup Vittus Qujaukitsup, Nunatta Qitornai, ataaniilerpoq.

Naalakkersuisut katitigaaneranni allanngortitsinerup malitsigisaanik allanik allanngortitsisoqanngilaq.