Aalisarnermut inatsisissatut siunnersuut piffissaq eqqorlugu nalunaarutigineqarpoq


Aalisarnermut, Piniarnermut Nunalerinermullu Naalakkersuisoqarfiup Inatsisartut ukiakkut ataatsimiinnissaannut oqaluuserisassatut siunnersuutip nalunaarutiginissaanut Inatsisartut Allattoqarfiata maleruaqqusai piffissaliuunneqartullu naapertorlugit nalunaaruteqarpoq.

Inatsisartut siulittaasoqarfiannut nalunaarutigineqartoq tassaavoq aalisarnermut inatsisissatut siunnersuutip oqaluuserineqarnissaata paasissutissartaanik kingusinnerusukkut nassitsinissamik nalunaaruteqarneq.

Nittartakkakkut nutaarsiassaqartitsivik Sermitsiaq.AG sisamanngornermi septembarip 6-anni 2018-imi ilaatigut allappoq Aalisarnermut, Piniarnermut Nunalerinermullu Naalakkersuisup aalisarnermut inatsissasut siunnersuut Inatsisartut Alloqarfiannut tallimanngornermi aggustip 24-anni nalunaaqutaq 12.00 nallertinnagu tunniussimanngikkaa.

Tamanna ilumuunngilaq - ilumoortorli tassaammat Aalisarnermut, Piniarnermut Nunalerinermullu Naalakkersuisoqarfik aalisarnermut inatsisissap oqaluuserineqarnissaanut paasissutissartaanik Naalakkersuisut siulittaasoqarfiannut aggustip 23-anni 2018-imi nalunaarutiginnimmat.

- Taamaattumik eqqunngitsumik allaaserinninneq sakkortunerpaamik akuerinngilara,

Aalisarnermut, Piniarnermut Nunalerinermullu Naalakkersuisoq, Erik Jensen erseqqissaavoq.

- Inatsisartut siulittaasoqarfiata Inatsisartut ataatsimiinnerisa nalaanni oqaluuserineqartussat pillugit maleruaqqussat tunngavigalugit aalisarnermut inatsisissatut siunnersuutitut oqaluuserisassaq uannit aamma Aalisarnermut, Piniarnermut Nunalerinermullu Naalakkersuisoqarfimmit nalunaarutigineqarmat erseqqissarusuppara, ullorlu tunniunneqarfissaata ullua nallertinnagu aamma nalunaarutigineqarluni,
Erik Jensen oqarpoq.

Inatsisartut Siulittaasoqarfiata allakkatigut erseqqissarpaa aalajangersimallutik aalisarnermut inatsisissatut siunnersuutip ilanngunneqarnissaa pillugu aalajangernissaq kinguartissimallugu, allagaq ima paasineqassalluni Siulittaasoqarfik aalajangersinnaasoq siunnersuutigineqartoq oqaluuserissanut ilanngussinnaallugu.

Siulittaasoqarfik allassimassagaluarpat oqaluuserissatut ilanngunniarnagu, tamanna allaqqinnaamik isumaqalissagaluarpoq: oqaluuserineqassanngitsoq.

-Taamaattumik neriuppunga naatsorsuutigalugu Inatsisartut siulittaasoqarfiata Inatsisartut ukiakkut ataatsimiinnissaannut aalisarnermut inatsisissatut siunnersuut oqaluuserisassanngortissallugu akuerissagaa,
Aalisarnermut, Piniarnermut Nunalerinermullu Naalakkersuisoq Erik Jensen oqarpoq.

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi pisortaaq, Jørgen Isak Olsen. Email: jio@nanoq.gl