Kalaalimineerniarfinni aalisakkat neqillu panertut pisiassaalerput

Naalakkersuisut aggustip 30-anni 2018-imi suliassaqarfiit inuussutissaleriffiusut pillugit Namminersornerullutik Oqartussat nalunaarutaanni normu 21-mi, 27. juli 1998-meersumut immikkut akuersinermut tunngasoq akuersissutigaat, taamaasiornikkut inuussutissat suliarineqarsimasut ilaannik, soorlu aalisakkanik neqinillu panertunik aamma neqit nakkutilliisunit misissorneqaqqaartartussaajunnaarsillugit.

Immikkut akuerissuteqarneq septembarip aallaqqaataanit 2018-imit 2019-ip naanissaata tungaanut atuutissaaq.

- Naalakkersuisooqatigiinnissamik isumaqatigiissut kiisalu kalaalimerngit ajornannginnerusumik pissarsiarineqarsinnaanissaanik tassunga ilanngullugu inuussutissanik suliarineqarsimasunik tunisisinnaalerlunilu tunisassiulersinnaanissamik kommuninit assigiinngitsunit aamma inuussutissanik tuniniaasartunit saaffiginnissutaasartut tunngavigalugit aaqqiissuteqassalluta suliaqarpugut, Aalisarnermut, Piniarnermut Nunalerinermullu Naalakkersuisoq Erik Jensen oqarpoq.

- Nuannaarutigeqaara piniartut aalisartullu piliaminnik annerusumik kalaalimineerniarfinni tunisisinnaalissammata, taamaalilluni kalaalimerngit amerlanerit tunineqartalersinnaassallutik, Erik Jensen erseqqissaavoq.

Immikkut akuersinerup kingunerisaanik nerisassat suliarineqarsimasut makku kalaalimineerniarfinnit tunisaalersinnaapput. Aalisakkat neqillu panertut. Aalisakkat neqillu qerisut. Aalisakkat neqillu tarajortikkat aamma neqit aalisakkallu pujuukkat.

Immikkut akuerineqartut tassaapput:

§ 3 aamma 26 piniartut aalisartullu aalisakkanik neqinillu panertunik, tarajortikkanik aammalu qerisunik tuniniaasartut suliffeqarfiit inuussutissaleriffiusut pillugit Namminersornerullutik Oqartussat nalunaarutaani normu 21, 27. juli 1998-imeersoq.

Nalunaarummi § 32 immikkoortoq 2 aamma 3, taamaasiornikkut uumasup angisuut assersuutigalugu neqaarniarfinnut, pisiniarfiit neqaarniarfiinut tunineqartinnatik neqaasa misissorneqaqqaartarnissaat pisariaarutissalluni.

Siunissaq ungasinnerusoq eqqarsaatigalugu inussutissalerineq taamaasillunilu innutaasut peqqissusaat isumannaatsuutikkumallugu kiisalu kalaallit nerisassaataanik ajornannginnerusumik pissarsisinnaalernissaq anguniarlugu inatsisip atuuttup nalilersoqqinnerani maleruagassanik nutaanik Kalaallit Nunaanni Uumasut Nakorsaqarfia Inuussutissalerinermullu Oqartussaaffik, UNIO, suliaqarniarpoq, maleruagassat pineqartut immikkut akuersissuteqarnerup naannerani atuuttussanngorlugit.

Uumasut Nakorsaqarfia Inuussutissalerinermullu Oqartussaaffiup erseqqissaassutigaa maleruaqqusat uku suli atuummata:
§ 17-imi aalajangersarneqarpoq tunisassiat tuniniarneqarnerminni tunniunneqarnerminnilu peqqinnissatigut akornguteqassanngitsut.

§ 22-mi aalajangersarneqarpoq tunisassiat eqqiluisaarneq eqqarsaatigalugu isumannaatsumik assartorneqartassasut. Piumasaqaatit pineqartut piniartut aalisartullu pisisartunut toqqaanartumik tuniniaasarnerini massakkut piumasaqaataasut assigaat.

Attavigineqarsinnaavoq uumasut@nanoq.gl